महाराष्ट्रात येताच अभिजीत दीपकेची आंदोलनाबाबत मोठी घोषणा, प्लॅन जाहीर

हेही वाचा : MPSC च्या विद्यार्थ्यांनी अध्यक्षांविरोधात रान पेटवलं, आता राज्य सरकारचा मोठा निर्णय

"आजीच्या निधनानंतर कुटुंबीयांशी बोलण्याची संधी दिली नाही"

अभिजीत दीपके यांनी दिल्ली पोलिसांच्या कारवाईवर प्रश्न उपस्थित केले. आपल्या आजीच्या निधनाची माहिती मिळाल्यानंतर गावात राहणाऱ्या भावाशी बोलण्यासाठी आपण पोलिसांकडे फोन मागितला होता, मात्र त्यांनी फोन दिला नाही, असा आरोप त्यांनी केला. भावाचा मोबाईल नंबर पाठ नसल्यामुळे स्वतःचा फोन दोन मिनिटांसाठी देण्याची विनंती केली होती. त्यातून नंबर काढून पोलिसांना देता आला असता, असंही त्यांनी सांगितलं. याशिवाय आपल्या वकिलांशी बोलण्याची परवानगीही देण्यात आली नसल्याचा आरोप त्यांनी केला. रात्री साडेतीन वाजता दिल्ली पोलिसांनी आई-वडिलांना फोन करून अटकेची माहिती देण्यास सांगितलं, यामागचा हेतू काय होता, असा सवाल त्यांनी उपस्थित केला. आजीच्या निधनानंतर कुटुंबीयांशी बोलण्याची संधी न मिळाल्याबद्दल त्यांनी नाराजी व्यक्त केली.

‘आम्ही काय आतंकवादी होतो का?’

पंतप्रधान नरेंद्र मोदी यांच्यावर टीका करताना दीपके यांनी त्यांच्यावर हुकूमशाहीचा आरोप केला. ज्ञानेश कुमार यांना वाचवण्यासाठी संपूर्ण दिल्ली बंद करण्यात आली, रस्ते आणि मेट्रो बंद करण्यात आले, तसेच विद्यार्थ्यांना आत बंद करून ठेवण्यात आल्याचा दावा त्यांनी केला. विमानातून अटक करण्यात आल्याचा उल्लेख करत त्यांनी, ‘आम्ही काय आतंकवादी होतो का?’ असा सवाल केला. आपण महात्मा गांधी यांचा संदेश देणारा टी-शर्ट घातला होता, असंही त्यांनी सांगितलं. दिल्ली पोलिसांच्या कारवाईदरम्यान महिला आणि मुलींशी गैरवर्तन झाल्याचे तसेच मारहाण झाल्याचे आरोप करण्यात आल्याचा उल्लेख करत त्यांनी पोलिसांच्या भूमिकेवर प्रश्न उपस्थित केले. ज्या पोलिस अधिकाऱ्यांवर आरोप झाले, त्यांचं प्रमोशन करण्यात आल्याचा दावाही त्यांनी केला. पोलिसांनी अशा कारवाईबाबत विचार करण्याची गरज असल्याचं मत त्यांनी व्यक्त केलं.

‘आम्हाला अटक करून, बेकायदेशीरपणे ताब्यात ठेवून आम्ही घाबरू किंवा शांत बसू, असं त्यांना वाटत असेल, तर ते चुकीचं आहे,’ असं दीपके म्हणाले. महात्मा गांधी आणि डॉ. बाबासाहेब आंबेडकर यांच्या विचारांच्या मार्गावर आपण चालत असल्याचं त्यांनी सांगितलं. संविधानाच्या मार्गाने आपला लढा सुरू राहील, असंही त्यांनी स्पष्ट केलं. ‘एकदा नाही, शंभर वेळा तुरुंगात टाका, तरी आम्ही घाबरणार नाही,’ अशी भूमिका त्यांनी मांडली. आजीच्या निधनामुळे आपण सध्या घरी आलो असून लवकरच पुन्हा आंदोलनासाठी रस्त्यावर उतरणार असल्याचं त्यांनी जाहीर केलं. आंदोलन थांबवण्याचा किंवा शांत बसण्याचा कोणताही निर्णय घेतलेला नसल्याचं सांगत त्यांनी आपली पुढील भूमिका स्पष्ट केली.