भाजपकडून वीज बिल वाटप करणाऱ्या तरुणाला उमेदवारी, आई धुणी-भांडी करते, तर वडील वॉचमन

अकोला महानगरपालिकेच्या प्रभाग क्रमांक 20 मधील अनुसूचित जातीसाठी राखीव जागेवर भाजपने मंगेश झिने या हलाखीची परिस्थिती असणाऱ्या तरुणाला थेट उमेदवारी दिली आहे. ही उमेदवारी केवळ राजकीय नव्हे, तर सामाजिकदृष्ट्याही चर्चेचा विषय ठरली आहे. कारण मंगेश झिने हे ना कोणत्या मोठ्या नेत्याचे नातेवाईक आहेत, ना त्यांच्या मागे पैसा किंवा ताकदवान गट आहे. मंगेश झिने हे अकोल्यातील खडकी भागात राहणारे एक सामान्य नागरिक असून गेल्या दहा वर्षांपासून ते महावितरणचे वीजबिल वाटप करण्याचे काम करत आहेत. त्यांची आई लोकांच्या घरी धुणी-भांडी करते, तर वडील चौकीदारीचे काम करतात. संपूर्ण कुटुंब एका खोलीच्या भाड्याच्या घरात राहते. रोजच्या जगण्याची धडपड करणारे हे गरीब कुटुंब अचानक राजकीय चर्चेच्या केंद्रस्थानी आले आहे.

हेही वाचा : बिघडलेला गाव सुधारायचा असेल तर पाटील आणि कुलकर्ण्यांना युती करावीच लागते; विश्वास पाटील नेमकं काय म्हणाले?

भाजपने मंगेश झिने यांना तिकीट देताना अकोला महानगरपालिकेतील भाजपचा एक मोठा आणि परिचित चेहरा असलेल्या विजय इंगळे यांचे तिकीट कापले. विजय इंगळे हे चार वेळा नगरसेवक राहिले असून, त्यांच्या तिकीट कापण्याच्या निर्णयामुळे शहरात खळबळ उडाली. नाराज झालेल्या विजय इंगळे यांनी बंडखोरी करत थेट ठाकरे गटाची उमेदवारी स्वीकारली आहे. त्यामुळे हा प्रभाग अधिकच चुरशीचा बनला आहे.

मंगेश झिने यांच्याकडे निवडणूक लढवण्यासाठी आवश्यक असलेली आर्थिक ताकद नाही. मोठे बॅनर, होर्डिंग्स किंवा भव्य प्रचार त्यांना शक्य नाही. त्यामुळे त्यांच्या प्रचाराची जबाबदारी इतर उमेदवार आणि स्थानिक कार्यकर्त्यांनी उचलली आहे. वर्गणी गोळा करून, घराघरात जाऊन प्रचार करण्यावर भर दिला जात आहे. ‘आपल्यासारखाच एक सामान्य माणूस नगरसेवक होण्यासाठी उभा आहे’ ही भावना भाजपकडून मतदारांपर्यंत पोहोचवली जात आहे. एका बाजूला घराणेशाही आणि पैशाच्या जोरावर उमेदवारी मिळते, असा आरोप होत असताना, दुसऱ्या बाजूला मंगेश झिने यांच्यासारख्या तरुणाला संधी देण्याचा निर्णय अनेकांना आश्चर्यकारक वाटतोय. अत्यंत प्रतिकूल परिस्थितीतून पुढे आलेला हा तरुण मतदारांचा विश्वास संपादन करू शकेल का? हे 16 जानेवारी रोजी होणाऱ्या मतमोजणीच्या दिवशी स्पष्ट होईल.

इतर महत्वाच्या बातम्या 

बिघडलेला गाव सुधारायचा असेल तर पाटील आणि कुलकर्ण्यांना युती करावीच लागते; विश्वास पाटील नेमकं काय म्हणाले?