Bihar Assembly Election 2025: बिहार 'Election' चं, काय आहे मुंबई 'कनेक्शन'?

निवडणूक बिहारमध्ये पण मुंबई कनेक्शन काय?

बिहारमध्ये विधानसभा निवडणूक होत असली त्याचा काहीसा परिणाम हा मुंबईत देखील पाहायला मिळतो. कारण कोट्यवधी बिहारी नागरिक हे मुंबईत वास्तव्य करतात. त्यामुळेच मुंबईतील बिहारी मतदारांकडे सर्वच पक्षांचं विशेष लक्ष असणार आहे. दरम्यान, बिहारमधील या निवडणुकीत बेरोजगारी आणि स्थलांतर ही प्रमुख मुद्दे ठरणार आहे, ज्यात बिहारमधून कोट्यवधी नागरिक मुंबईसारख्या शहरांत पोटापाण्यासाठी स्थायिक झाले आहेत. मुंबईत कोट्यवधी बिहारी राहतात, ज्यांचा बिहारमधील मतदारसंघांवर मोठा प्रभाव पडू शकतो. भाजपसारख्या पक्षांनी या मतदारांना लक्ष्य करून विशेष अभियान देखील सुरू केले आहे.

हे ही वाचा>> परळी, पंढरपूर, बार्शी ते संगमनेर,राज्यातील 68 नगरपरिषदा खुल्या प्रवर्गातील महिलेसाठी राखीव; पाहा संपूर्ण यादी

मुंबई हे बिहारमधून स्थलांतरितांच्या दृष्टीने एक प्रमुख शहर आहे. मोठ्या प्रमाणात बिहारी नागरिक हे मुंबईत राहतात, ज्यातील बहुसंख्य मजूर, दैनंदिन कामगार आणि छोट्या व्यवसायात गुंतलेले आहेत.

विशेषत: फार्मा, सुरक्षा, हॉटेल, रिअल इस्टेट आणि इतर क्षेत्रांत ते सक्रिय आहेत. मात्र, बिहारमधील मतदार यादीत त्यांचे नाव असले तरी, मतदानासाठी परत जाणे कठीण आहे. विशेषत: निवडणूक आयोगाच्या स्पेशल इंटेन्सिव्ह रिव्हिजन (SIR) मुळे, ज्यात लाखो मतदारांची नावे काढली गेली, अशा स्थलांतरितांना परत जाऊन फॉर्म भरावे लागणार आहेत. 

मुंबईतील बिहारी कामगारांना हा खर्च आणि वेळेचा प्रश्न आहे, ज्यामुळे त्यांचा मतदानाचा हक्क धोक्यात आहे. बिहारमधील नेते या मुंबईतील मतदारांना विसरलेले नाहीत. भाजपने विशेष मोहिमेअंतर्गत देशभरातील बिहारी स्थलांतरितांना लक्ष्य केले आहे. मुंबईसह दिल्ली, गुजरात, पंजाब येथे सभा, दारोदार भेटी आणि छठ पूजेसारख्या सणांशी जोडलेले कार्यक्रम घेतले जात आहेत.

पक्षाने 150 जिल्ह्यांत बिहारी मतदारांची यादी तयार केली असून, मुंबईसह इतर राज्यातील मिळून 3 कोटी स्थलांतरित मतदारांना परत येऊन मतदान करण्यासाठी प्रोत्साहन दिले जात आहे.

हे ही वाचा>> नगराध्यक्षपदासाठी आरक्षण सोडत जाहीर, राज्यातील 16 नगरपालिका SC महिलांसाठी तर 34 नगरपालिका ओबीसी महिलांसाठी राखीव

भाजपसोबतच जनता दल (युनायटेड) आणि इतर NDA घटक पक्षही मुंबईतील बिहारी मतदारांशी संपर्क साधत आहेत. पूर्वीच्या निवडणुकांतही (2015 मध्ये) भाजपने मुंबईतील बिहारी स्मेलनांचे आयोजन देखील केले होते. 

मात्र, विरोधी पक्ष RJD आणि काँग्रेस मात्र स्थलांतरितांच्या 'क्रोधाला' लक्ष्य करत आहेत. ते म्हणतात, NDA सरकारमुळे बिहारमधून लोक बाहेर पडत आहेत आणि मुंबईसारख्या शहरांत त्यांना अपमान सहन करावा लागतो. हिंदी विरोध आणि बिहारी नागरिकांना होणारा विरोध हे देखील मुद्दे निवडणुकीत प्रामुख्याने गाजतात.

निवडणुकीच्या पार्श्वभूमीवर मुंबईतील बिहारी मतदारांची भूमिका निर्णायक ठरेल. छठ पूजा आणि दिवाळीसारखे सण निवडणूक काळाशी जुळत असल्याने, लाखो लोक परत येतील आणि त्यांचे मते NDA किंवा INDIA ब्लॉकला फायदेशीर ठरू शकतात. 

मात्र, SIR प्रक्रियेमुळे मतदार यादीतील अडचणींमुळे अनेकांचा हक्क गमावला जाण्याची भीती आहे. बिहार नेत्यांना आता या 'बाहेरील' मतदारांना कसे परत आणायचे आणि त्यांचा विश्वास कसा जिंकायचा, हाच मोठा प्रश्न आहे.