CM फडणवीस स्वत: उतरले मैदानात अन् श्रीकांत शिंदेंच्या बालेकिल्ल्यात मारली मुसंडी, अंबरनाथ-बदलापुरात भाजपची सत्ता!

निवडणुकीची पार्श्वभूमी

महाराष्ट्र राज्य निवडणूक आयोगाने डिसेंबर 2025 मध्ये दोन टप्प्यांत 288 नगर परिषदा आणि नगर पंचायतींच्या निवडणुका घेतल्या. ठाणे जिल्ह्यातील अंबरनाथ (59 जागा) आणि कुळगाव-बदलापूर (49 जागा) या नगर परिषदा दुसऱ्या टप्प्यातील प्रमुख केंद्र होत्या. या निवडणुकांमध्ये भाजप, शिवसेना-शिंदे गट यांच्यातच मुख्य लढत होती. त्यामुळे अनेक मतदारसंघात या दोन पक्षात थेट लढत पाहायला मिळाली.

ठाणे जिल्हा हा शिवसेनेचा पारंपरिक बालेकिल्ला मानला जातो. गेल्या दशकभरात या भागात शिवसेनेने (मूळ आणि आता शिंदे गट) बहुमत मिळवले होते. 2015 च्या निवडणुकांमध्ये अंबरनाथमध्ये शिवसेनेला 25 जागा मिळाल्या होत्या, तर भाजपला केवळ 10. बदलापूरमध्येही शिवसेनेला 24 जागा मिळाल्या होत्या. मात्र, या वेळी राजकीय समीकरणे बदलली आणि भाजपने धोरणात्मक खेळी करत नगराध्यक्षपद पटकावत नगर परिषदेवर वर्चस्व मिळवलं आहे.

अंबरनाथ नगर परिषदेचे निकाल

अंबरनाथ नगर परिषदेत एकूण 59 जागांसाठी लढत झाली. येथे शिवसेनेचे (शिंदे गट) नगरसेवक सर्वाधिक संख्येने निवडून आले. शिवसेनेचे एकूण 27 उमेदवार विजयी झाले. तर भाजपचे केवळ 14 नगरसेवकच विजयी झाले. तर काँग्रेसने 14, राष्ट्रवादी आणि इतर अपक्षांनी उर्वरित जागा पटकावल्या. मात्र, नगराध्यक्षपदाच्या थेट निवडणुकीत भाजपच्या उमेदवार तेजश्री करंजुले-पाटील यांनी शिवसेनेच्या (शिंदे गट) मनिषा वाळेकर यांचा पराभव केला. अंबरनाथ आणि बदलापूरमध्ये युती न झाल्याने भाजप आणि शिवसेना (शिंदे गट) यांनी स्वतंत्र उमेदवार उभे केले होते.

या विजयानंतर तेजश्री करंजुले म्हणाल्या, "हा विजय अंबरनाथच्या जनतेचा आहे. आम्ही विकासाच्या मुद्द्यावर निवडणूक लढवली आणि जनतेने आमच्यावर विश्वास दाखवला." 

बदलापूर नगर परिषदेचा निकाल

कुळगाव-बदलापूर नगर परिषदेत 49 जागांसाठी निवडणूक झाली. येथे शिवसेना (शिंदे गट) आणि भाजप यांचे समसमान  नगरसेवक निवडून आले आहेत. शिवसेना शिंदे गट आणि भाजप 23-23 जागांवर विजयी झाले आहेत. तर राष्ट्रवादी (अजित पवार) 3 जागा मिळाल्या. तर, नगराध्यक्षपदाच्या थेट निवडणुकीत भाजपच्या रुचिता घोरपडे यांनी शिवसेनेच्या (शिंदे गट) वीणा म्हात्रे यांचा मोठा मताधिक्याने पराभव केला.

या निकालावर बोलताना रुचिता घोरपडे म्हणाल्या, "बदलापूरच्या विकासासाठी आम्ही कटिबद्ध आहोत. जनतेने आम्हाला संधी दिली आहे." 

शिवसेनेच्या बालेकिल्ल्याला भाजपने लावला सुरूंग

ठाणे जिल्हा हा शिवसेनेचा पारंपरिक गड आहे, जिथे पक्षाने दशकांपासून सत्ता गाजवली आहे. मात्र, 2022 च्या पक्ष फुटीमुळे शिवसेना दोन गटांत विभागली गेली. शिंदे गट महायुतीचा भाग असला तरी, या निवडणुकांमध्ये भाजप आणि शिंदे गट यांच्यात स्वतंत्र लढत दिसली. परिणामी, शिवसेनेच्या पारंपरिक मतदारांची विभागणी झाल्याने भाजपला फायदा झाला. राजकीय विश्लेषकांच्या मते, भाजपने विकास, पायाभूत सुविधा आणि स्थानिक मुद्द्यांवर भर देऊन जनतेचा विश्वास जिंकला.

मुख्यमंत्री देवेंद्र फडणवीस यांनी विजयाचे श्रेय पक्षकार्यकर्त्यांना दिले आणि म्हणाले, "भाजप हा राज्यातील सर्वात मोठा पक्ष म्हणून उदयास आला आहे." 

अंबरनाथ हा उपमुख्यमंत्री एकनाथ शिंदे आणि खासदार डॉ. श्रीकांत शिंदे यांचा बालेकिल्ला मानला जात होता. आमदार, खासदार आणि नगराध्यक्ष अशी तिन्ही सत्ता शिवसेनेकडे असतानाही भाजपने येथे सत्ता मिळवली, हे विशेष मानले जात आहे.

या दोन्ही नगरपरिषदांमध्ये भाजपचा विजय घडवून आणण्यात बदलापूरमध्ये किसन कथोरे तर अंबरनाथमध्ये गुलाबराव करंजुले यांनी महत्त्वाची भूमिका बजावल्याचे बोलले जात आहे.

दरम्यान, ठाणे जिल्ह्यात येत्या 15 जानेवारीला सहा महानगरपालिकांच्या निवडणुका होणार आहेत. बदलापूर आणि अंबरनाथमधील यशामुळे भाजपचे पदाधिकारी व कार्यकर्ते उत्साहित असून, आगामी निवडणुकांमध्ये युती न करता स्वबळावर लढण्याची मागणी जोर धरत आहे. जर युती झाली नाही, तर येत्या काळात शिवसेनेसाठी ही बाब चिंतेची ठरू शकते. बदलापूर आणि अंबरनाथप्रमाणेच या ठाणे जिल्ह्यातील सहा महानगरपालिकांमध्येही शिवसेनेला मोठा धक्का बसणार होणार का, याकडे आता संपूर्ण राजकीय वर्तुळात सुरू आहे.

अंबरनाथमध्ये काँग्रेसनेही अपेक्षेपेक्षा चांगली कामगिरी केली आहे. शहराध्यक्ष प्रदीप पाटील यांच्या नेतृत्वाखाली काँग्रेसने यावेळी 12 जागा जिंकल्या. त्यांच्या पत्नी नूतन पाटील यांनीही नगराध्यक्षपदाच्या निवडणुकीत लक्षणीय मते मिळवली. दुसरीकडे बदलापूरमध्ये महाविकास आघाडीतील घटक पक्ष वेगवेगळे निवडणूक लढवत असल्याने त्यांना खातेही उघडता आले नाही.

या निवडणुकीत अनेक वैयक्तिक राजकीय धक्केही पाहायला मिळाले. अंबरनाथमध्ये मनीषा वाळेकर यांचे पुत्र निखिल यांचा पराभव झाला, तर त्यांचे दीर राजेंद्र वाळेकर मात्र विजयी झाले.

 प्रचारादरम्यान कार्यालयावर गोळीबार झालेल्या घटनेमुळे चर्चेत असलेले भाजप उमेदवार पवन वाळेकर यांनी आपल्या पॅनलसह विजय मिळवत थरारक लढतीत स्वतःच्या चुलत भावाला पराभूत केले.

बदलापूरमध्ये शिवसेनेचे शहर प्रमुख वामन म्हात्रे अवघ्या 38 मतांनी आपली जागा वाचवू शकले, मात्र त्यांची पत्नी नगराध्यक्षपदाची निवडणूक हरली, तर मुलगा आणि पुतण्या यांनाही पराभव स्वीकारावा लागला.

राजकीय विश्लेषकांच्या मते, शिवसेना खासदार डॉ. श्रीकांत शिंदे यांच्या माध्यमातून झालेल्या विकासकामांमुळे शिवसेना कार्यकर्ते विजयाबाबत आश्वस्त होते. मात्र पक्षातील अंतर्गत गटबाजी शिवसेनेसाठी अडचणीची ठरली आणि त्याचा थेट फायदा भाजपला मिळाला.

भविष्यातील राजकीय परिणाम

हे निकाल मुंबई महानगरपालिका (BMC) आणि इतर प्रमुख निवडणुकांसाठी महत्वाचे आहेत. ठाणे जिल्ह्यात शिवसेनेच्या प्रभावाला धक्का बसल्याने महाविकास आघाडीला नव्याने रणनीती आखावी लागेल. महायुतीने राज्यभरात 200 हून अधिक संस्थांमध्ये आघाडी घेतली असून, भाजपने 130 हून अधिक नगराध्यक्षपदे पटकावली आहेत. या निकालांमुळे महाराष्ट्राच्या राजकारणात भाजपची पकड मजबूत होत असल्याचे दिसते.