Ram Mandir: सोनिया गांधी राम मंदिरात जाणार की नाही?, जाहीर केला मोठा निर्णय

Congress Leader : गेल्या काही दिवसांपासून राम मंदिर (Ram Mandir) प्राणप्रतिष्ठा कार्यक्रमाची अयोध्येबरोबरच (Ayodhya) देशात जोरदार तयारी सुरु आहे. या कार्यक्रमासाठी अनेकांना निमंत्रण पत्रिकाही (invitation card) पाठवण्यात आली आहे. त्यामुळे आता त्यावरून देशातील राजकारण तापले आहे. तर आता राम मंदिर प्राणप्रतिष्ठा कार्यक्रमाचे काँग्रेसला (Congress) मिळालेले निमंत्रण काँग्रेसकडून नाकारण्यात आले आहे. काँग्रेसकडून निवेदन काढून याची माहिती देण्यात आली आहे.

निमंत्रण नाकारले

राम मंदिर प्राणप्रतिष्ठा कार्यक्रमाचे मिळालेले निमंत्रण काँग्रेसकडून सन्मानपूर्वक आणि आदरपूर्वक नाकारण्यात आल्याचे सांगण्यात आले. 22 जानेवारी रोजी होणाऱ्या या कार्यक्रमासाठी सोनिया गांधी आणि मल्लिकार्जुन खर्गे यांच्यासह काँग्रेसचा कोणताही नेता अयोध्येला जाणार नसल्याचे यावेळी स्पष्ट करण्यात आले.

हे ही वाचा >>MLA Disqualification: CM शिंदेंविरोधात निकाल गेला तर.. असं बदलेल महाराष्ट्राचं राजकारण

काँग्रेसचा थेट आरोप

काँग्रेसचे सरचिटणीस जयराम रमेश यांनी एक निवेदन काढून सांगितले की, गेल्या महिन्यात काँग्रेस अध्यक्ष आणि राज्यसभेतील विरोधी पक्षनेते मल्लिकार्जुन खर्गे, काँग्रेस संसदीय पक्षाच्या अध्यक्षा सोनिया गांधी आणि काँग्रेस पक्षाचे लोकसभेतील नेते अधीर रंजन चौधरी यांना अयोध्येत होणाऱ्या कार्यक्रमासाठी आमंत्रित करण्यात आले होते. मात्र आपल्या देशात लाखो लोक रामाची पूजा करतात, त्यामुळे धर्म ही वैयक्तिक गोष्ट आहे.  तरीही राष्ट्रीय स्वयंसेवक संघ आणि भाजपने मात्र या कार्यक्रमाचा राजकीय कार्यक्रम राबवला असल्याचा आरोप काँग्रेसकडून करण्यात आला आहे.

मंदिर अजूनही अपूर्ण

यावेळी त्यांनी हे ही सांगितले की, राम मंदिराचे बांधकाम अजूनही अपूर्ण आहे. तरीही भाजप आणि राष्ट्रीय स्वयंसेवक संघ आणि भाजपच्या नेत्यांकडून निवडणुकीच्या फायद्यासाठी मंदिराचे उद्घाटन केले जात आहे. 2019 च्या सर्वोच्च न्यायालयाच्या निकालानंतर आणि प्रभू रामाचा आदर राखून काँग्रेसच्या, मल्लिकार्जुन खर्गे, सोनिया गांधी आणि अधीर रंजन चौधरी यांना मिळालेले निमंत्रण आदरपूर्वक नाकारण्यात येत असल्याचे सांगण्यात आले.

ती काँग्रेसची मर्जी

राम मंदिर प्राणप्रतिष्ठा कार्यक्रमाचे निमंत्रण काँग्रेसला देण्यात आले मात्र ते नाकारल्याचे काँग्रेसकडून सांगण्यात आले. त्यावर ‘विहिंप’ने काँग्रेसवर बोलताना सांगितले की, आमच्याकडून काँग्रेसला निमंत्रण देण्यात आले आहे. त्यांना जर यायचे नसेल तर ती त्यांची मर्जी आहे. त्यामुळे त्यांच्या या निर्णयाला आम्हाला काही हरकत नसल्याचेही त्यांनी सांगितले.

पाहुण्यांची दीर्घ यादी

अयोध्येत 22 जानेवारी रोजी भव्यदिव्य कार्यक्रमाचे आयोजन केले गेले आहे. या कार्यक्रमाला प्रमुख पाहुणे म्हणून पंतप्रधान नरेंद्र मोदी सहभागी होणार आहेत. त्यामुळे या कार्यक्रमासाठी केंद्र आणि राज्य सरकारचे अधिकारीही या कार्यक्रमात व्यस्त आहेत. राम मंदिराचा होणाऱ्या अभिषेक कार्यक्रमाच्या एक आठवड्याआधीच धार्मिक कार्यक्रम सुरू होणार आहेत. त्यामुळे अजूनही या कार्यक्रमासाठी पाहुण्यांना आमंत्रणे पाठवली जात आहेत. श्री रामजन्मभूमी तीर्थ क्षेत्र ट्रस्ट, विश्व हिंदू परिषद आणि राष्ट्रीय स्वयंसेवक संघाच्या अधिकाऱ्यांकडून या कार्यक्रमासाठी पाहुण्यांची यादी तयार केली आहे. या पाहुण्यांच्या यादीमध्ये जवळपास 150 समाजातील नागरिकांचा समावेश असल्याचेही सांगण्यात आले आहे.

सुरक्षेची नियमित तालीम

अयोध्येत 22 जानेवारी रोजी प्राणप्रतिष्ठा कार्यक्रमावेळी अयोध्येत पंतप्रधानांसह देशातील प्रमुख मान्यवरांचा मेळावा होणार आहे. या कार्यक्रमासाठी आठवडाभराआधीच फक्त कडक सुरक्षा व्यवस्था करण्यात आली नाही तर त्यासाठी सुरक्षेची तालीमही घेतली जात आहे. अयोध्येत 16 जानेवारीपासूनच कार्यक्रमाची सुरुवात होणार आहे, त्यामुळे फक्त सुरक्षा व्यवस्थाच तेवढी कडक ठेवण्यात आली नाही तर त्यासाठी नियमित तालीमही घेतली जात आहे. सुरक्षेबाबतीत अयोध्येत कोणताही तडजोड स्वीकारली नाही, कारण या कार्यक्रमाला पंतप्रधान नरेंद्र मोदी, उत्तर प्रदेशचे मुख्यमंत्री योगी आदित्यनाथ, राष्ट्रीय स्वयंसेवक संघाचे प्रमुख मोहन भागवत, उत्तर प्रदेशचे राज्यपाल यांच्यासह अडीच हजार लोकं उपस्थित राहणार आहेत.