शरद पवार अध्यक्ष असलेल्या वसंतदादा शुगर इन्स्टिट्यूटची देवेंद्र फडणवीसांनी चौकशी लावली, नेमकं प्रकरण काय?

अलीकडेच मुख्यमंत्री देवेंद्र फडणवीस यांच्या अध्यक्षतेखाली साखर उद्योग नियोजनासंदर्भात झालेल्या बैठकीत हा विषय चर्चेत आला. बैठकीदरम्यान या निधीच्या वापराबाबत सविस्तर तपासणी करण्याची मागणी करण्यात आली. त्यानंतर सरकारने साखर आयुक्तांच्या अध्यक्षतेखाली एक विशेष चौकशी समिती स्थापन करण्याचे निर्देश दिले आहेत. ही समिती सन 2009-10 पासून सुरू असलेल्या निधी योजनेचा तपशीलवार आढावा घेणार असून, अनुदानाच्या वापराची सखोल छाननी करणार आहे. समितीचा अहवाल प्राप्त झाल्यानंतर सरकार पुढील कारवाईचा निर्णय घेणार असल्याचे सूत्रांनी सांगितले. राजकीय तज्ज्ञांच्या मते, ही चौकशी केवळ आर्थिक अनियमिततेचा शोध घेण्यासाठी नसून, राजकीय पातळीवर शरद आणि अजित पवार यांना लक्ष्य करण्याचा प्रयत्न असल्याची चर्चा सध्या राजकीय वर्तुळात जोर धरत आहे.

हेही वाचा : 'दोन उद्योगपतींची मुंबईवर नजर, अमित शाह 'अ‍ॅनाकोंडा'! उद्धव ठाकरेंचा मोदी-शाहांवर घणाघाती हल्ला

रोहित पवारांची फेसबुक पोस्ट चर्चेत 

रोहित पवार म्हणाले, राज्यातील ऊस उत्पादनातील वाढीच्या माध्यमातून साखर उद्योगाला चालना देण्यात मांजरी येथील वसंतदादा शुगर इन्स्टिट्यूटचा (VSI) सर्वांत मोठा वाटा आहे. आदरणीय पवार साहेबांच्या अध्यक्षतेखाली मा. अजितदादांसह सर्वपक्षीय नेते पक्षाच्या पलीकडं जाऊन केवळ शेतकऱ्यांच्या हितासाठी गेल्या अनेक वर्षांपासून या संस्थेवर काम करतात. तरीही या संस्थेच्या चौकशीचे मुख्यमंत्र्यांनी दिलेले आदेश ही केवळ नियमित प्रक्रिया नाही तर भाजपाने ‘ठाण्यानंतर’ आपला मोर्चा आता ‘बारामतीकडं’ वळवल्याचा त्याचा अर्थ आहे. भाजपला कुबड्यांची गरज नाही हे कालच गृहमंत्री अमित शाह साहेबांनी स्पष्ट केलं आणि सोबतच VSI च्या चौकशीचे मुख्यमंत्र्यांनी आदेश दिले. हा कुबड्यांवरील अवलंबित्व कमी करण्याचा तर प्रयत्न नाही ना! हे लवकरच स्पष्ट होईल. 

महत्त्वाचं म्हणजे जिथं आम्ही कोट्यवधी रुपयांच्या भ्रष्टाचाराचे पुरावे देतो तिथं सरकार मौन बाळगतं, चौकशी करत नाही, पण राजकीय द्वेषातून एका चांगल्या संस्थेची चौकशी करून संस्थेचं नाव बदनाम केलं जातं, हे भाजपाचं आधुनिक राजकारण आहे. यातून कदाचित भाजपाचा राजकीय डाव साध्य होईल, पण राज्याचं मात्र नुकसान होतंय, त्याचं काय? असा सवालही रोहित पवार यांनी केलाय. 

इतर महत्त्वाच्या बातम्या 

उद्धव ठाकरे म्हणाले, ‘भाजपवाले भुरटे चोर', आता खासदार उदयनराजे भोसलेंचं प्रत्युत्तर