राज ठाकरेंना आव्हान देणाऱ्या भाजप खासदार निशिकांत दुबेंची लोकसभेत जीभ घसरली.. म्हणाले, 'नेहरू अय्याशी...'

भाजप खासदार निशिकांत दुबे यांचं लोकसभेत वादग्रस्त विधान

निशिकांत दुबे म्हणाले, 'इथे पुस्तकावर चर्चा सुरू आहे.. एका पुस्तकावर चर्चा सुरू आहे. असं पुस्तक जे आजपर्यंत छापलंच गेलं नाही. मी तुमच्या माध्यमातून सभागृहाला त्या पुस्तकांबाबत सांगू इच्छितो जो नेहरू कुटुंबीय, काँग्रेस कुटुंबीयांच्या गद्दारी, मक्कारी.. भ्रष्टाचार आणि अय्याशीने भरलेलं आहे. ही सगळी पुस्तकं छापलेली आहेत.'

हे ही वाचा>> महाराष्ट्रातल्या 'या' खासदाराला लोकसभेतून केलं निलंबित, राहुल गांधींसाठी सत्ताधाऱ्यांना भिडणारा तो खासदार कोण?

'पहिलं पुस्तक हे आहे.. एडविना अँड नेहरू.. भारत जेव्हा स्वतंत्र झाला तर कशा पद्धतीने पाकिस्तानची फाळणी झाली आणि कशा प्रकारे भारताचे पहिले पंतप्रधान अय्याशी करत होते हे या पुस्तकात आहे. मी त्याचा उल्लेख करू इच्छितो.'

राहुल गांधीजी, तुम्ही गेल्या तीन दिवसांपासून एका अप्रकाशित पुस्तकावर संसदेला ओलीस ठेवले आहे. काही प्रकाशित पुस्तकांवरही सभागृहात चर्चा झाली पाहिजे. गांधी-नेहरू कुटुंबाचा इतिहास खोटेपणा, कपट, भ्रष्टाचार आणि देश तोडणाऱ्यांचा आहे."

हे ही वाचा>> राहुल गांधींना सलग दुसऱ्या दिवशीही 'त्यावर' बोलू दिलं नाही! लोकसभेतील नेमका गोंधळ काय?

निशिकांत दुबे पुढे असंही म्हणाले की, "या नेहरू-गांधी कुटुंबाने या सर्व पुस्तकांवर बंदी घातली आहे. संपूर्ण काँग्रेस पक्षाने देशाचे नुकसान केले आहे. त्यांनी भ्रष्ट आणि देशविरोधी घटकांना पाठिंबा दिला आहे. गांधी-नेहरू कुटुंबाला वाटते की ते देशाचे राजे आहेत आणि ते राजेशाहीत राहतात. आम्हाला या सर्व पुस्तकांवर चर्चा करायची आहे.'' असं वादग्रस्त विधान निशिकांत दुबेंनी केलं आहे.

राहुल गांधी माजी लष्करप्रमुख मनोज नरवणेंचं पुस्तक देणार पंतप्रधान मोदींना!

बुधवारी (4 फेब्रुवारी 2026) लोकसभेतील विरोधी पक्षनेते राहुल गांधी माजी लष्करप्रमुख मनोज नरवणे यांच्या अप्रकाशित पुस्तकाची प्रत घेऊन संसदेत पोहोचले आणि त्यातील एका उताऱ्याचा हवाला देत दावा केला की, 'जेव्हा चिनी टँक भारतीय सीमेच्या दिशेने पुढे येत होते तेव्हा पंतप्रधान नरेंद्र मोदी यांनी त्यांच्या जबाबदाऱ्यांकडे दुर्लक्ष केले होते. ते म्हणाले की जर पंतप्रधान नरेंद्र मोदी सभागृहात आले तर ते त्यांना हे पुस्तक भेट देईन.'