माजी खासदार जयाप्रदा फरार? अडचणीत वाढ, नेमकं प्रकरण काय?

Former mp Jayaprada: माजी खासदार आणि चित्रपट अभिनेत्री जयाप्रदा या पुन्हा एकदा चर्चेत आल्या आहेत. निवडणूक आचारसंहिता भंग (code of conduct) केल्याप्रकरणी उत्तर प्रदेश न्यायालयाने (UP Court) जयाप्रदा यांना 'फरार' घोषित केले आहे. त्यांच्या विरुद्ध आचारसंहिता भंग केल्याची पाच वर्षापूर्वीची जुनी प्रकरणं न्यायालयात प्रलंबित आहेत.

अजामीनपात्र वॉरंट

 या प्रकरणातील दोन्ही प्रकरणांच्या सुनावणीदरम्यान त्या हजर झाल्या नाहीत. तर 7 वेळा अजामीनपात्र वॉरंटही त्यांना बजावण्यात आले आहे. त्यानंतर खासदार-आमदारांच्या विशेष न्यायालयाने जयाप्रदा यांना 'फरार' असल्याचे घोषित केले आहे.

प्रकरण 2019 मधील

माजी खासदार जया प्रदा यांचे हे प्रकरण 2019 मधील आहे. लोकसभा निवडणुकीत भाजपने जया प्रदा यांना उमेदवारी दिली होती. त्यावेळी त्यांच्यासमोर समाजवादी पक्षाचे उमेदवार आझम खान यांच्याबरोबर लढत होती. 

आचारसंहितेचे उल्लंघन

लोकसभा निवडणुकीचा प्रचार चालू असतानाच जयाप्रदा यांनी आचारसंहितेचे उल्लंघन करत नूरपूर गावात त्यांनी एका रस्त्याचे उद्घाटन केल्याचा आरोप त्यांनी त्यांच्यावर केला होता. त्यामुळे या प्रकरणी जया प्रदा यांच्या विरोधात स्वार पोलिसात गुन्हा दाखल करण्यात आला होता.

आक्षेपार्ह टिप्पणी
 

तसेच या निवडणुकीच्या प्रचारादरम्यान जया प्रदा जेव्हा केमरी पोलीस स्टेशन परिसरात पोहोचल्या होत्या तेव्हा त्यांनी पिपलिया मिश्रा गावात एका जाहीर सभेला संबोधित करत आक्षेपार्ह टिप्पणी केली होती. त्यामुळे हे प्रकरणही पोलिसात गेले होते, व त्यानंतर त्यांच्याविरोधात गुन्हा दाखल करण्यात आला होता.

जया प्रदा यांच्याविरोधात दाखल झालेले हे दोन्ही प्रकरणं 2019 च्या लोकसभा निवडणुकीतील आहेत. निवडणूक आचारसंहितेचे उल्लंघन केल्याप्रकरणी ही दोन्ही प्रकरणं पोलिसात गेली होती. केमरी आणि स्वार पोलिसांनी दोन्ही प्रकरणांचा तपास पूर्ण करून खासदार-आमदार विशेष न्यायालयात या प्रकरणी दोषारोपपत्र दाखल करण्यात आले.

जबाब नोंदवला जाणार

या प्रकरणी तक्रार दाखल केलेल्या फिर्यादीची साक्ष घेण्यात आली आहे, तर आता 313 कलमांतर्गत जयाप्रदा यांचा जबाब नोंदवला जाणार आहे. या प्रकरणाच्या यापूर्वी अनेक तारखांना सुनावणी झाली होती, मात्र जया प्रदा न्यायालयात हजर झाल्या नाहीत. 

त्यामुळे त्यांच्याविरुद्ध 7 वेळा एनबीडब्ल्यू (अजामिनपात्र) वॉरंट जारी करण्यात आल्यानंतर त्या न्यायालयात हजर होऊ शकल्या नाहीत. त्यामुळे अशा परिस्थितीत न्यायालयाकडून जयाप्रदा यांच्यावर मोठी कारवाई करत त्यांना फरार घोषित करण्यात आले आहे.

वॉरंट का निघाले

शोभित बन्सल यांच्या अध्यक्षतेखालील विशेष न्यायालयाने रामपूरच्या पोलीस अधीक्षकांना जयाप्रदा यांना अटक करून न्यायालयात हजर करण्याचे आदेश दिले आहेत. त्यामुळे उत्तर प्रदेश पोलीस आता जयाप्रदा यांचा शोध घेत आहेत.  त्यांना फरार घोषित करण्यात आल्यामुळे त्यांच्या मुंबईसह अन्य ठिकाणच्या संभाव्य ठिकाणांची माहिती घेऊन पोलीस त्यांच्यावर कधीही छापा टाकू शकतात अशी शक्यता वर्तवली आहे.

या प्रकरणाचा रामपूर पोलिसांनी अहवाल देताना न्यायालयाला सांगितले की, या प्रकरणातून वाचण्यासाठी जयाप्रदा स्वतः प्रयत्न करत आहेत. कारण त्यांना अनेक वेळा न्यायालयाकडून समन्स बजावूनही त्या न्यायालयात हजर राहू शकल्या नाहीत, आणि त्यातच आता त्यांचा मोबाईलही स्वीच ऑफ असल्याचे दिसून येत आहे.

अंतिम तारीख दिली

त्यावर न्यायालयाने जयाप्रदा यांच्यावर सीआरपीसी कलम 82 अन्वये कारवाई केली असून पोलीस अधीक्षकांना अतिरिक्त पोलीस अधीक्षकांच्या नेतृत्वाखाली एक टीम तयार करून 6 मार्च रोजी जयाप्रदा यांना न्यायालयात हजर करण्याचे आदेश देण्यात आले आहेत.