पुणे महापालिका : सर्वात श्रीमंत उमेदवार, 271.85 कोटींची संपत्ती; 1.75 किलो सोनं अन् आलिशान गाड्यांचं कलेक्शन

प्रतिज्ञापत्रात दिलेल्या माहितीनुसार, सुरेंद्र पठारे यांची गुंतवणूक प्रामुख्याने रिअल इस्टेट क्षेत्रात आहे. याशिवाय त्यांच्या मालकीच्या आलिशान वाहनांच्या यादीत मर्सिडिज बेंझ, बीएमडब्ल्यू आणि इनोव्हा क्रिस्टा यांसारख्या महागड्या गाड्यांचा समावेश आहे. वैयक्तिक संपत्तीच्या बाबतीतही ते मागे नाहीत. त्यांच्या नावावर सुमारे 1.75 किलो सोन्याचे दागिने असल्याचंही या प्रतिज्ञापत्रातून समोर आलं आहे. त्यामुळे संपत्तीच्या बाबतीत त्यांनी इतर सर्व उमेदवारांना मागे टाकलं आहे.

सायली वांजळे यांच्याकडे 77.65 कोटींची संपत्ती

या यादीत दुसऱ्या क्रमांकावर खडकवासल्याचे दिवंगत आमदार रमेश वांजळे यांची कन्या सायली वांजळे यांचा क्रमांक लागतो. सायली वांजळे यांच्या नावावर एकूण 77.65 कोटी रुपयांची मालमत्ता असल्याची नोंद आहे. तुलनेने पाहता, पहिल्या आणि दुसऱ्या क्रमांकातील उमेदवारांच्या संपत्तीत मोठी तफावत दिसून येते, जी मतदारांमध्येही चर्चेचा विषय ठरत आहे.

बापूसाहेब पठारेंच्या कुटुंबातील 3 जण कमळावर लढणार

दरम्यान, या संपत्तीच्या चर्चेबरोबरच वडगाव शेरी विधानसभा मतदारसंघातील राजकीय घडामोडींनाही विशेष महत्त्व प्राप्त झालं आहे. राष्ट्रवादी काँग्रेस (शरद पवार गट) पक्षाचे पुण्यातील एकमेव आमदार बापूसाहेब पठारे ज्या ‘तुतारी’ चिन्हावर निवडून आले होते, तेच चिन्ह आता त्यांच्या मतदारसंघात होणाऱ्या महापालिका निवडणुकीत दिसून येत नाही. आमदार बापूसाहेब पठारे स्वतः शरद पवार गटात असतानाही, त्यांच्या कुटुंबातील सदस्यांनी मात्र थेट भाजपमध्ये प्रवेश करून कमळ चिन्हावर निवडणूक लढवण्याचा निर्णय घेतल्याने राजकीय समीकरणे बदलली आहेत.

विशेष म्हणजे, एकीकडे आमदार बापूसाहेब पठारे राष्ट्रवादी (शरद पवार गट) इच्छुक उमेदवारांच्या मुलाखती घेत असताना, दुसरीकडे त्यांच्या घरातीलच सदस्य भाजपच्या तिकिटावर निवडणूक लढवण्याच्या तयारीत असल्याचं चित्र पाहायला मिळालं होतं. भाजपने आमदार आणि खासदारांच्या नातेवाईकांना उमेदवारी देऊ नये, असं धोरण जाहीर केलं असतानाही पठारे कुटुंबातील तब्बल तिघांना उमेदवारी मिळाल्याने आश्चर्य व्यक्त केलं जात आहे.

भाजपकडून आमदार पठारे यांच्या कुटुंबातील कोणाकोणाला उमेदवारी देण्यात आली आहे, याचीही चर्चा रंगली आहे. भाजपने आमदार पठारे यांचे चिरंजीव सुरेंद्र पठारे, त्यांची सून ऐश्वर्या पठारे आणि पठारे यांचे भाचे संतोष भरणे यांच्या पत्नीला अधिकृत उमेदवारी दिली आहे. सुरेंद्र पठारे प्रभाग क्रमांक 4 (खराडी–वाघोली), ऐश्वर्या सुरेंद्र पठारे प्रभाग क्रमांक 3 (विमाननगर–लोहगाव) तर संतोष भरणे यांच्या पत्नी प्रभाग क्रमांक 4 मधून भाजपच्या उमेदवार म्हणून निवडणूक लढवत आहेत. त्यामुळे पुणे महापालिकेच्या निवडणुकीत पठारे कुटुंब आणि त्यांच्या संपत्तीची चर्चा केंद्रस्थानी राहणार, हे निश्चित आहे.