नरेंद्र मोदींच्या नेतृत्वात चालणाऱ्या पक्षाबाबत तुम्ही बोलत आहात,भाजपचा अजित पवारांना निर्वाणीचा इशारा

"नरेंद्र मोदी आणि देवेंद्र फडणवीस यांच्या नेतृत्वाखालील पक्षाबद्दल बोलत आहात"

"अजित पवारांचं वक्तव्य निवडणुकीच्या पार्श्वभूमीवर असणारं वक्तव्य आहे, असं मला वाटतं. अजित पवार यांनी सर्वप्रथम स्वत:च्या पक्षाकडे पाहिले पाहिजे. ते कोणत्या पक्षाबद्दल बोलत आहेत? ते नरेंद्र मोदी आणि देवेंद्र फडणवीस यांच्या नेतृत्वाखालील पक्षाबद्दल बोलत आहेत, हे त्यांनी ध्यानात ठेवावे. खरं तर आरोप प्रत्यारोप कसे करावेत हे त्यांनी ठरवले पाहिजे. आम्ही कधी आरोप करायला गेलो तर त्यांना फार अडचणी निर्माण होतील, याची त्यांनी काळजी घेतली पाहिजे", असा निर्वाणीचा इशारा भाजप प्रदेशाध्यक्ष रवींद्र चव्हाण यांनी अजित पवारांना दिलाय.

हेही वाचा : दिवगंत मनसे नेते रमेश वांजळेंची कन्या पुणे मनपा निवडणुकीतील दुसऱ्या क्रमांकाची श्रीमंत उमेदवार, संपत्ती किती?

मंत्री चंद्रशेखर बावनकुळे म्हणाले, महायुतीतील प्रत्येक वरीष्ठ नेत्याने ठरवलंय की, निवडणूक लढवताना मतभेद आणि मनभेद होणार नाही, याची काळजी तिन्ही पक्षांनी घ्यायची. अजित पवार असं का बोलले? हे मला माहिती नाही. अजित पवारांनी असं बोलायला नकोय. महायुतीत मतभेद होणार नाहीत, याची काळजी अजित पवार आणि आम्ही घ्यायची आहे. 

अजित पवारांनी कोणते आरोप केले होते?

आशियातील सर्वाधिक श्रीमंत महानगरपालिका म्हणून ओळख असलेल्या पिंपरी-चिंचवड महापालिकेवर प्रचंड कर्जाचा बोजा चढवण्यात आला आहे. रस्त्यांची वारंवार खोदाई, कचरा व्यवस्थापन, रस्ते व पदपथांचे बांधकाम, तसेच कुत्र्यांच्या नसबंदीसारख्या कामांतही भ्रष्टाचार झाल्याचा दावा अजित पवारांनी केला. शहरातील नेत्यांनी आपापसात रस्त्याच्या अलीकडे-पलीकडे असे क्षेत्र वाटून घेतल्याचा आरोप करत, प्रत्येक कामाच्या टेंडरमध्ये संगनमत केले जाते, असे गंभीर आरोप त्यांनी भाजपवर केले.

इतर महत्त्वाच्या बातम्या 

शरद पवार, रामदास आठवलेंसह महाराष्ट्रातील सात खासदार एप्रिलमध्ये राज्यसभेतून निवृत्त होणार, पाहा संपूर्ण यादी