रोहित शर्मा झाला षटकारांचा बादशाह, रांचीच्या मैदानावर इतिहास रचला; शाहिद आफ्रिदीचा दशकभरापासूनचा विक्रम मोडीत

टॉस हरला मात्र, भारताची मजबूत सुरुवात

दक्षिण आफ्रिकेने नाणेफेक जिंकल्यानंतर भारताला प्रथम फलंदाजी करावी लागली. यशस्वी जैयस्वाल लवकर बाद झाल्यानंतर रोहित आणि विराट कोहलीने तिसऱ्या विकेटसाठी शतकी भागीदारी रचत डाव सावरला. रोहितने 51 चेंडूत 57 धावांची प्रभावी खेळी करत 3 षटकार आणि 5 चौकारांची आतषबाजी केली.

20 व्या षटकात इतिहास घडला

डावाच्या 20व्या षटकात मार्को जॅन्सनच्या चेंडूवर रोहितने फटका मारत आपला 352 वा वनडे षटकार नोंदवला आणि त्याच क्षणी आफ्रिदीचा (351) विक्रम मागे टाकला. मागील 10 वर्षांपासून आफ्रिदीच्या नावावर असलेला हा जागतिक विक्रम अखेर रोहितकडे आला आहे. विशेष म्हणजे, वनडेमधील सर्वाधिक षटकार लावणाऱ्या टॉप-10 यादीतील इतर सर्व फलंदाज निवृत्त झाले आहेत. त्यामुळे रोहितचा हा विक्रम पुढील अनेक वर्षे अबाधित राहण्याची शक्यता आहे.

हेही वाचा : 'दोन नंबरला किंमत नसते.." रवींद्र चव्हाणांच्या वक्तव्याने शिंदेसेना आणि भाजपमधील वाद शिगेला, डोंबिवलीत चव्हाणांसमोरच..

वनडे क्रिकेटमधील सर्वाधिक षटकार मारणारे टॉप 5 खेळाडू

1. रोहित शर्मा (भारत) – 352

2. शाहिद आफ्रिदी (पाकिस्तान) – 351

3. क्रिस गेल (वेस्ट इंडीज) – 331

4. सनथ जयसूर्या (श्रीलंका) – 270

5. एम. एस. धोनी (भारत) – 229

सलग तिसऱ्या सामन्यात 50+ धावा

रोहितची सातत्यपूर्ण कामगिरीही उल्लेखनीय आहे. ऑस्ट्रेलियाविरुद्धच्या मागील दोन वनडेत त्याने अनुक्रमे 73 आणि नाबाद 121 धावा केल्या होत्या. त्या दोन्ही सामन्यांतही त्याने कोहलीसोबत शतकी भागीदारी केली. रांचीतील या सामन्यातही कोहलीबरोबर शतकी भागीदारी रचत रोहितने सलग तिसऱ्या वनडेत 50+ धावा केल्या. रांचीतील हे अर्धशतक रोहितच्या वनडे कारकिर्दीतील 60वे अर्धशतक आहे. तसेच या फॉर्मेटमध्ये त्याच्या नावावर 33 शतकेही आहेत. टी20 आणि कसोटी क्रिकेटमधून निवृत्त झाल्यानंतर रोहित आता फक्त वनडे क्रिकेट खेळत आहे.

इतर महत्त्वाच्या बातम्या 

जिची हत्या केली म्हणून तुरुंगात गेला, ती तरुणी बॉयफ्रेंडसोबत आलिशान घरात सापडली, पोलिसही चक्रावले