बीड : देवदर्शनासाठी चाललेल्या तरुणाला ट्रकने उडवलं, जागीच मृत्यू

बीड जिल्ह्यातील पेंडगाव येथे अमावास्येनिमित्त देवदर्शनाचे मोठे महत्त्व असते. याच श्रद्धाभावातून अमर पंडितराव बापमारे (वय 26) आणि नाना उद्धव बापमारे हे दोन तरुण शनिवारी दुपारी 12 च्या सुमारास दुचाकीवरून देवदर्शनासाठी निघाले होते. माजलगावकडून गढीच्या दिशेने जात असताना, जातेगाव फाटा परिसरात त्यांच्या दुचाकीला पाठीमागून येणाऱ्या उसाच्या ट्रकने (क्र. एमएच 11 एएल 0518) धडक दिली. यामध्ये अमरचा जागेवर मृत्यू झाला तर नाना गंभीररित्या जखमी झालाय. 

हेही वाचा : बीड : घोटाळेबाज कुटे दाम्पत्याला घेऊन जाणाऱ्या पोलीस व्हॅनला दुचाकीस्वारांनी दिली धडक, अपघातात एकाचा दुर्देवी अंत

​हा अपघात एवढा भीषण होता की, दुचाकीचालक अमर बापमारे याचा जागीच मृत्यू झाला. ऐन विशीतल्या तरुणाचा असा दुर्दैवी अंत झाल्याने बापमारे कुटुंबावर दुःखाचा डोंगर कोसळला आहे. या अपघातात दुसरा तरुण, नाना बापमारे हा गंभीर जखमी झाला असून त्याचा पाय फॅक्चर झाला आहे. त्याला तातडीने जवळच्या रुग्णालयात उपचारासाठी दाखल करण्यात आले आहे. अपघातानंतर स्थानिक नागरिकांनी तातडीने धाव घेत मदतकार्य केले आणि तलवाडा पोलिस ठाण्याला माहिती दिली. पोलिसांनी तातडीने घटनास्थळी पोहोचून पंचनामा केला आणि वाहतूक सुरळीत केली. या प्रकरणी पोलिसांनी ट्रक चालकाविरुद्ध गुन्हा दाखल करण्याची प्रक्रिया सुरू केली असून, तलवाडा पोलिस पुढील तपास करत आहेत.​रस्त्यावरील अवजड वाहनांची वर्दळ आणि वेगमर्यादेचे उल्लंघन यामुळे अशा घटना वारंवार घडत असल्याचे बोलले जात आहे. या अपघातामुळे मंगरूळ गावात शोककळा पसरली आहे.