'गाव दत्तक घ्यावे'

गावातील बहुतांश कुटुंबे दसऱ्याच्या आधीच कारखान्यांवर ऊस तोडणीसाठी निघून गेली आहेत. शासनाने दुष्काळ जाहीर केला असला, तरी गावात अद्याप छावण्या किंवा पाण्याचे टँकर सुरू झालेले नाहीत, तसेच मदतनिधी शेतकऱ्यांपर्यंत पोहोचलेला नाही. पिण्याच्या पाण्यासाठी महिलांना दोन-तीन किलोमीटर भटकंती करावी लागत आहे. पाण्याची तीव्र टंचाई असल्यामुळे गावकऱ्यांना भांडे घासलेले आणि कपडे धुऊन उरलेले पाणी जनावरांना पाजावे लागत आहे. अशा बिकट परिस्थितीत गावाला कायमस्वरूपी पाण्याची सोय व्हावी आणि पंकजा मुंडे यांनी हे गाव दत्तक घ्यावे, अशी आर्त हाक स्थानिक ग्रामस्थांनी दिली आहे.

हे ही वाचा : मनोज जरांगे पाटील यांनी ऑडिओ बॉम्ब फोडल्यानंतर वर्षावर काय खलबतं झाली?

अनेक कुटुंबांमध्ये ताटातूट

दुष्काळामुळे अनेक कुटुंबांमध्ये ताटातूट झाली असून लहान मुले आणि वृद्ध आई-वडिलांना मागे सोडून पालक कामासाठी निघून गेले आहेत. ज्या मुलांच्या शाळा आणि परीक्षा आहेत, त्यांना गावाकडेच आजी-आजोबांकडे ठेवण्यात आले आहे. एका दहावीत शिकणाऱ्या विद्यार्थ्याने आपली व्यथा मांडताना सांगितले की, परीक्षा असल्यामुळे तो गावातच थांबला असून रोज 10 किलोमीटर पायपीट करत उपाशीपोटी शाळेत जात आहे. घरात खायला नाही आणि प्यायला पाणी नाही, अशा अत्यंत वेदनादायी आणि केविलवाण्या परिस्थितीत लहान मुले आणि वृद्ध दिवस कंठत आहेत.

हे ही वाचा : Maharashtra Weather : राज्यात वातावरणात बदल, 'या' जिल्ह्यांना उष्ण आणि दमट हवामानाचा यलो अलर्ट

चोऱ्यांचे प्रमाण वाढले

ऑक्टोबर महिन्यातच पाण्याचे हे भीषण हाल असताना, पुढील काळात परिस्थिती कशी सांभाळायची असा यक्षप्रश्न खडकवाडीतील उरलेल्या ग्रामस्थांसमोर उभा राहिला आहे. गावात माणसे नसल्यामुळे चोऱ्यांचे प्रमाणही वाढले आहे. पूर्वी असणाऱ्या साखर शाळा किंवा इतर सुविधाही आता उपलब्ध नसल्याने मुलांचे शिक्षण आणि संगोपन दोन्ही धोक्यात आले आहे. शासनाने त्वरित हस्तक्षेप करून खडकवाडीसह मराठवाड्यातील दुष्काळग्रस्त भागांत टँकर, छावण्या आणि अन्नधान्याची मदत तातडीने पुरवावी, अशी मागणी जोर धरत आहे.