नांदेडमधील 'तलवार बाबा'ला पोलिसांनी उचललं, महिला अन् लहान मुलांना कसं गंडवायचा? कारनामे उघड
Nanded Crime : नांदेडच्या बिलोली तालुक्यातील 'तलवार बाबा' ऊर्फ ज्ञानेश्वर कर्डे याच्या ढोंगी दरबारवर पोलिसांनी छापा टाकून अंधश्रद्धेच्या नावाखाली सुरू असलेल्या लुबाडणुकीचा पर्दाफाश केला आहे.
ADVERTISEMENT
बातम्या हायलाइट
नांदेडमधील 'तलवार बाबा'ला पोलिसांनी उचललं,
महिला अन् लहान मुलांना कसं गंडवायचा? कारनामे उघड
Nanded Crime News : महाराष्ट्रातील नांदेड जिल्ह्यातील बिलोली तालुक्यातील बडूर गावात अंधश्रद्धेच्या नावाखाली सुरू असलेल्या एका मोठ्या गैरप्रकाराचा पोलिसांनी पर्दाफाश केला आहे. स्वतःला 'तलवार बाबा' म्हणवून घेणाऱ्या ज्ञानेश्वर कर्डे याच्या तथाकथित दरबारावर पोलिसांनी छापा टाकून त्याला बेड्या ठोकल्या आहेत. गेल्या 4 वर्षांपासून हा आरोपी दैवी शक्तीच्या नावाखाली लोकांची दिशाभूल करत होता. आपल्या शरीरात दैवी शक्ती येते आणि आपण सर्व आजार बरे करू शकतो, तसेच कौटुंबिक समस्या सोडवून वाईट शक्तींपासून मुक्ती मिळवून देऊ शकतो, असे खोटे दावे करून तो भोळ्याभाबड्या नागरिकांना आपल्या जाळ्यात ओढत असे. या दरबारादरम्यान तो हातामध्ये तलवार घेऊन विशेषतः महिला आणि लहान मुलांच्या मनात भीती निर्माण करत असे, जेणेकरून कोणीही त्याच्या शब्दाबाहेर जाणार नाही.
लिंबू आणि जादूटोण्याच्या नावाखाली पैशांची लूट
आरोपी ज्ञानेश्वर कर्डे हा लिंबू आणि इतर विविध प्रकारच्या गोष्टींचा वापर करून लोकांना आपल्या जाळ्यात अडकवत असे. संकटातून मुक्ती मिळवून देण्याच्या नावाखाली तो लोकांकडून मोठ्या प्रमाणात रोख रक्कम आणि मौल्यवान वस्तू उकळत असल्याचे समोर आले आहे. स्थानिक नागरिकांकडून या छळवणुकीबाबत वारंवार तक्रारी प्राप्त झाल्यानंतर पोलीस दलाने या प्रकरणाची गांभीर्याने दखल घेतली. उपविभागीय पोलीस अधिकारी श्याम पानेगावकर आणि पोलीस निरीक्षक अतुल भोसले यांच्या नेतृत्वाखालील पथकाने अत्यंत गुप्तपणे सापळा रचून ही मोठी कारवाई केली. छाप्यादरम्यान पोलिसांना घटनास्थळावरून अंधश्रद्धेशी संबंधित अनेक संशयास्पद वस्तू आणि साहित्य सापडले असून ते सर्व जप्त करण्यात आले आहे.
हेही वाचा : 'जा बेटा घरी जा..', 'बेटा' म्हणाल्याने युवकाच्या डोक्यात तिडीक गेली, थेट हॉटेल मालकाचा घेतला जीव
पोलिसांच्या या कारवाईदरम्यान आरोपीच्या काही समर्थकांनी आणि अनुयायांनी सरकारी कामात अडथळा आणण्याचा प्रयत्न केला. पोलिसांशी हुज्जत घालून कारवाई थांबवण्याचा प्रयत्न करणाऱ्या शिवकांत मेलारे आणि नबाजी वाघेकर यांच्यासह इतर काही जणांविरुद्धही पोलिसांनी कडक पावले उचलली आहेत. या सर्वांवर महाराष्ट्र जादूटोना विरोधी कायद्यांतर्गत आणि सरकारी कामात अडथळा आणल्याप्रकरणी गुन्हे नोंदवून त्यांना ताब्यात घेण्यात आले आहे. भोंदू बाबांच्या वाढत्या प्रस्थामुळे आणि त्यांच्याकडून होणाऱ्या शोषणाचे प्रकार वाढल्यामुळे प्रशासन आता अधिक सतर्क झाले आहे. बडूर गावातील या कारवाईमुळे परिसरात एकच खळबळ उडाली असून पोलिसांनी अशा ढोंगी बाबांच्या नादी न लागण्याचे आवाहन नागरिकांना केले आहे.
