नांदेड: मुलगा होण्यासाठी वैद्याकडे नेलं अन् सतत मारहाण... सासरच्या जाचाला कंटाळून गर्भवती महिलेची आत्महत्या!

पीडित महिलेचं नाव प्रतीक्षा भोसले असून तिचं दोन वर्षांपूर्वी नांदेडमध्ये राहणाऱ्या लक्ष्मण भोसले नावाच्या तरुणासोबत लग्न झालं होतं. लग्नानंतर, वर्षभरातच तिला मुलगी झाली. त्यानंतर, ती दुसऱ्यांदा गरोदर राहिल्यानंतर आता मुलगाच व्हावा, यासाठी तिला सासरच्या लोकांना खूप त्रास दिला. 

हे ही वाचा: मुंबईची खबर: भारतातील पहिला बुलेट ट्रेन प्रोजेक्ट प्रगतीपथावर! पहिल्या रूटचं काम अंतिम टप्प्यात...

मुलगा होण्यासाठी वैद्याकडे नेलं अन्... 

इतकेच नव्हे तर, प्रतीक्षाला तिच्या माहेरहून पैसे आणण्यासाठी सुद्धा दबाव आणला जात होता. तिच्या सासरचे लोक तिच्याकडे माहेरी जाऊन 5 लाख रुपये आणण्याची मागणी करत होते. यासाठी सुद्धा तिचा छळ करण्यात आला. प्रतीक्षाला पहिली मुलगी झाल्यानंतर, ती काही काळानंतर पुन्हा गर्भवती राहिली होती. पण त्या काळात तिला सतत मारहाण करण्यात आल्याने तिचा गर्भपात झाल्याचं सांगण्यात येत आहे. त्यानंतर, ती पुन्हा गरोदर राहिली आणि आता यावेळी तिला मुलगा होण्यासाठी एका वैद्याकडे सुद्धा नेण्यात आलं. उपचारांसाठी वैद्याने तिला कानात टाकण्यासाठी एक औषध दिलं होतं. परंतु, कानाचा त्रास असल्याकारणाने प्रतीक्षा ते औषध कानात टाकत नव्हती. या कारणाने सुद्धा तिला तिच्या पतीने खूप मारहाण केली. 

हे ही वाचा: पाळीव बुलडॉगने 4 वर्षांच्या चिमुकलीवर केला जीवघेणा हल्ला! केस आणि त्वचा ओरबाडली... अखेर, मुलीचा दुर्दैवी मृत्यू

सासरच्या लोकांवर गुन्हा दाखल 

केवळ पतीच नव्हे तर, मुलगा होण्यासाठी प्रतीक्षाच्या नणंदा देखील तिला त्रास देत असल्याची माहिती आहे. पीडित महिलेच्या नणंदा तिला सतत फोन करून शिवीगाळ करायच्या आणि धमकी द्यायच्या. अखेर, सासरच्या लोकांकडून होणारा त्रास असह्य झाल्याने तिने गळफास घेऊन आत्महत्या केली. आता या प्रकरणी, पीडित महिलेच्या वडिलांनी दिलेल्या तक्रारीच्या आधारे, आरोपी पती आणि तिच्या तीन नणंदांवर पोलीस स्टेशनमध्ये गुन्हा दाखल करण्यात आला आहे.