आईच्या जातीच्या आधारे मुलीला SC प्रमाणपत्र दिलं, सुप्रीम कोर्टाचा मोठा निर्णय; महत्त्वाचं निरीक्षणही नोंदवलं
Supreme Court allows SC certificate for girl based on caste of mom : ‘आईची जात प्रमाणपत्राचा आधार का होऊ नये?’ अशी विचारणाही न्यायाधीशांनी केली आहे. “काळ बदलत असताना, जात प्रमाणपत्र आईच्या जातीवर आधारित का देऊ नये?” असा सवालही त्यांनी केलाय.
ADVERTISEMENT
बातम्या हायलाइट
आईच्या जातीच्या आधारे मुलीला SC प्रमाणपत्र
सुप्रीम कोर्टाचा मोठा निर्णय; महत्त्वाचं निरीक्षणही नोंदवलं
नवी दिल्ली : अल्पवयीन विद्यार्थिनीच्या शिक्षणात अडथळा निर्माण होऊ नये म्हणून सर्वोच्च न्यायालयाने सोमवारी (दि.9) एक महत्त्वपूर्ण निर्णय घेतला. वडील अनुसूचित जातीचे नसतानाही, मुलीला तिच्या आईच्या ‘आदिद्राविड’ जातीनुसार अनुसूचित जात (एससी) प्रमाणपत्र देण्यास न्यायालयाने तात्पुरती मान्यता दिली आहे. हा निर्णय ‘अपवादात्मक’ मानला जात असून यामुळे जातनिश्चितीच्या कायद्यावर मोठी चर्चा पुन्हा पेटण्याची शक्यता आहे.
शिक्षणात अडथळा येऊ नये म्हणून न्यायालयाचा हस्तक्षेप
मुख्य न्यायाधीश सूर्यकांत आणि न्यायमूर्ती जॉयमाल्या बागची यांच्या खंडपीठाने मद्रास उच्च न्यायालयाचा आदेश कायम ठेवत याविरोधातील याचिका फेटाळली. पुद्दुच्चेरीतील एका मुलीला शिक्षणासाठी आवश्यक असलेले एससी प्रमाणपत्र मिळणार नाही, तर तिचे शैक्षणिक नुकसान होऊ शकत असल्याचे न्यायालयाने नमूद केले.
खंडपीठ म्हणाले,“कायदेशीर प्रश्न आम्ही पुढे ठेवत आहोत; पण विद्यार्थिनीच्या करिअरवर परिणाम होऊ नये म्हणून निर्णय देत आहोत.” ‘आईची जात प्रमाणपत्राचा आधार का होऊ नये?’ अशी विचारणाही न्यायाधीशांनी केली आहे. “काळ बदलत असताना, जात प्रमाणपत्र आईच्या जातीवर आधारित का देऊ नये?” असा सवालही त्यांनी केलाय.
या टिप्पणीमुळे पुढे व्यापक चर्चा होण्याची शक्यता आहे. यानुसार, अनुसूचित जातीच्या महिलांचे उच्चवर्णीय पुरुषांसोबत विवाह झाले असले तरी, त्यांच्या मुलांना आईच्या जातीनुसार एससी प्रमाणपत्र मिळू शकते का? अशी चर्चा सुरु झाली आहे. पुढील काळात न्यायालयाच्या या निर्णयाचा अनेक प्रकरणांमध्ये आधार घेतला जाऊ शकतो.
हे वाचलं का?
