ठाणे : मोहम्मद शेजाऱ्याच्या घरात वाकून बघायचा, अन् तरुणीला त्रास द्यायचा, शेवटी काय घडलं?

शेजाऱ्याच्या घरात डोकावण्याच्या वादातून घडले हत्याकांड

या प्रकरणाची सविस्तर पार्श्वभूमी 21 मे 2016 रोजी मुंब्रा येथील कौसा परिसरात घडलेल्या एका घटनेशी संबंधित आहे. आरोपी मोहम्मद असगर हा त्याचा शेजारी अहमद राजा शेख याच्या घरात डोकावत असे आणि त्याच्या बहिणीला त्रास देत असे, यावरून दोघांमध्ये वारंवार वाद होत होते. घटनेच्या दिवशी याच कारणावरून दोघांमध्ये पुन्हा एकदा शाब्दिक चकमक झाली आणि वादाचे रूपांतर हाणामारीत झाले. संतापाच्या भरात आरोपी मोहम्मद असगर आपल्या घरामध्ये गेला आणि तिथून एक धारदार चाकू घेऊन परतला. त्याने अहमद राजा शेख याच्यावर सर्वांसमोर चाकूने अनेक वेळा सपासप वार केले. या प्राणघातक हल्ल्यामुळे परिसरात प्रचंड खळबळ उडाली होती आणि गंभीर जखमी झालेल्या अहमदला तात्काळ मुंबईतील सायन रुग्णालयात उपचारासाठी दाखल करण्यात आले होते.

हेही वाचा : लातूर : टेबलवर दारु, हातात सिगारेट..शिक्षकानं ढाब्यावरच तपासल्या उत्तरपत्रिका, व्हिडिओ सोशल मीडियात व्हायरल

न्यायालयाने सुनावली जन्मठेप आणि 50 हजारांचा दंड

रुग्णालयात दाखल केल्यानंतर अहमद राजा शेख याने सलग तीन दिवस मृत्यूशी झुंज दिली, मात्र दुर्दैवाने उपचारादरम्यान त्याचा मृत्यू झाला. या घटनेनंतर मुंब्रा पोलिसांनी हत्येचा गुन्हा दाखल करून तपासाला सुरुवात केली होती. खटल्याच्या सुनावणी दरम्यान अतिरिक्त सत्र न्यायाधीश डी. एस. देशमुख यांनी सर्व बाजू ऐकून घेतल्या. न्यायालयाने मोहम्मद असगर याला भारतीय दंड संहितेच्या कलम 302 (हत्या) आणि 504 (जाणीवपूर्वक अपमान) अंतर्गत दोषी ठरवले. त्याला जन्मठेपेची शिक्षा सुनावतानाच 50 हजार रुपयांचा दंडही ठोठावण्यात आला आहे. न्यायालयाने आपल्या निरीक्षणात नोंदवले की, आरोपीने अत्यंत क्रूरपणे आणि जाणीवपूर्वक हा प्राणघातक हल्ला केला होता, ज्यामध्ये एका निष्पाप तरुणाचा बळी गेला.