Ulhasnagar : मासिक पाळीचं रक्त पाहून खवळला अन् भावाने 12 वर्षाच्या बहिणीला संपवलं!

मिळालेल्या माहितीनुसार, उल्हासनगरमधील मध्यवर्ती रुग्णालयात काल (मंगळवार) दुपारी 2 वाजेच्या सुमारास एका 12 वर्षीय मुलीला उपचारासाठी तिचे कुटुंबीय घेऊन आले होते. त्यावेळी कर्तव्यावर असलेले वैदयकिय अधिकारी डॉ. प्रतिक यांनी तिला तपासल्यानंतर मयत घोषित केलं. तसेच तिच्या शरीरावर मारहाणीच्या खुणा असल्याने तात्काळ ह्या घटनेची माहिती मध्यवर्ती पोलिसांना देखील कळवली.

नेमकं काय घडलं?

12 वर्षीय मृत मुलगी ही आपला मोठा भाऊ आणि वहिनीसोबत राहत होती. तर तिचे आई-वडील हे गावी राहतात. मुलीची हत्या करणारा तिचा भाऊ हा सुरक्षा गार्डचं काम करतो. मुलीला काही दिवसांपूर्वीच मासिक पाळी आली होती. ज्यामुळे तिचे कपडे हे रक्ताने माखले होते. कपड्यांवर रक्ताचे डाग पाहून भावाने आपल्या लहान बहिणीला याबाबत विचारणा केली. पण वयाने अगदीच लहान असलेल्या या मुलीला आपल्या भावाला नेमकं उत्तर देता आलं नाही.

दरम्यान, यावेळी मुलीच्या वहिनीने तिच्या पतीच्या मनात बहिणीबाबत संशयाच्या किडा सोडला. यावेळी तिने आपल्या पतीला काही चुकीच्या गोष्टी सांगितल्या. मुलीच्या वहिनीने तिच्या पतीला असंही सांगितलं की, तुमच्या बहिणीचं काहीतरी प्रेम वैगरे सुरू आहे आणि जो काही रक्तस्त्राव होतोय तो केवळ संभोगामुळेच झाला आहे.

हे ही वाचा >> पोलीस जावयाला, पोलीस सासऱ्याने घडवली जन्मभराची अद्दल.. आता भोगावी लागणार जन्मठेप!

बायकोने ही गोष्ट सांगितचा मुलीचा भाऊ हा प्रचंड संतापला आणि त्याने आपल्या बहिणीला प्रचंड मारहाण सुरू केली. सलग तीन दिवस तो तिला मारहाण करत होता. तीन दिवस तो तिला लाथा-बुक्क्यांनी मारत होता. ‘तुझे शारीरिक संबंध झाले आहेत का?’, अशी सतत विचारणा तो तिला करत होता. मात्र, याबाबत बहिणीला फार काही उत्तरंच देता येत नव्हती. सुरुवातीला दोन दिवस लाथा-बुक्क्यांनी मारहाण करणाऱ्या भावाने तिसऱ्या दिवशी थेट स्टीलच्या पक्कडनेच बहिणीला मारहाण केली. ही मारहाण एवढी भीषण होती की, मुलगी थेट जमिनीवर कोसळली. ज्यानंतर ती उठलीच नाही. यामुळे घाबरलेल्या भावाने तिला रुग्णालयात नेलं. जिथे तिला मृत घोषित करण्यात आलं.

यानंतर डॉक्टरांनी मृत मुलीचं पोस्टमॉर्टम केलं. ज्यामध्ये तिच्या चेहऱ्यावर, मानेवर, पाठीवर मारहाणीमुळे गंभीर दुखापत झाल्याचं आढळून आलं. ज्याबाबतची माहिती डॉक्टरांनी पोलिसांना दिली. त्यामुळे पोलिसांनी याप्रकरणी सुरुवातीला मुलीच्या भावाकडे विचारणा केली. पण त्याने फारशी समाधानकारक उत्तरं दिली नाही.

हे ही वाचा >> शेजाऱ्याकडून बायको राहिली गर्भवती; पतीने केलेलं कृत्य ऐकून पोलिसही झाले सुन्न

मात्र, घटनेचं गांभीर्य लक्षात घेऊन मध्यवर्ती पोलीस ठाण्याचे वरिष्ठ पोलीस निरीक्षक मधुकर कड याच्या आदेशाने पोलिस निरीक्षक सुहास आव्हाड, सहाय्यक पोलीस निरीक्षक महेश राळेभात यांच्या पथकाने मुलीच्या भावाला ताब्यात घेऊन त्याला पोलिसी खाक्या दाखवला. तेव्हा त्याने घडल्या प्रकाराची कबुली दिली. ज्यानंतर पोलिसांनी त्याच्यावर गुन्हा दाखल करुन त्याला अटक केली.

दरम्यान, या संपूर्ण घटनेमुळे मुलीच्या आई-वडिलांना आणि त्यांच्या नातेवाईकांना मोठा धक्का बसला आहे. केवळ मासिक पाळीबाबत असलेल्या अज्ञानामुळे भावाने सख्ख्या बहिणीची ज्या पद्धतीने हत्या केली त्यामुळे आता याबाबत अनेक प्रश्नही निर्माण झाले आहे.