टायगर श्रॉफ गोळीबार प्रकरणात नवीन खुलासा, सात गोळ्या अन्...

हल्ल्याच्या वेळी टायगर श्रॉफ आपल्या कारमध्ये होता. तो सुखरूप बचावला, तर त्याच्या ड्रायव्हरसह दोन जण जखमी झाले. गुन्हे शाखा या प्रकरणाचा तपास करत आहे.

नेमकी कशी असते झिगाना पिस्तूल?

प्राथमिक माहितीनुसार, गोळीबारात वापरलेल्या शस्त्रांपैकी एक तुर्की बनावटीचे झिगाना पिस्तूल असू शकते. तपासात असेही उघड झाले आहे की, एका शस्त्रातील बिघाडामुळे एक संपूर्ण काडतूस बाहेर फेकले गेले. घटनास्थळी सापडलेली दोन पूर्ण काडतुसे या संशयाला दुजोरा देतात. मात्र, याची पुष्टी तपासानंतरच होऊ शकते.

हे ही वाचा>> टायगर श्रॉफवर गोळ्या झाडणारे तिघे 15 मिनिटात कसे सापडले?, पोलिसांनी दिल्ली धक्कादायक माहिती

हल्ल्यापूर्वी करण्यात आलेली रेकी 

पोलिसांच्या म्हणण्यानुसार, हल्लेखोरांनी घटनेपूर्वी परिसराची पाहणी केली होती. प्रत्यक्षदर्शींनी दिलेल्या माहितीनुसार, ते पुष्पा पार्कजवळ सुमारे 45 मिनिटे थांबले होते. टायगर गाडीतून उतरून कारमध्ये बसताच गोळीबार सुरू झाला. व्हिडिओ फुटेजमध्ये मोटरसायकलवर तीन जण दिसत होते. त्यापैकी एक जण मोटरसायकल चालवत होता, तर इतर दोघे खाली उतरून कारवर गोळीबार करताना दिसले. घटनेनंतर तिघेही घटनास्थळावरून पळून गेले.

हे ही वाचा>> टायगर श्रॉफवर गोळीबार, 15 तासांत शुटर कोटा येथे कसे पोहोचले?

कोटा येथे तीन संशयितांना अटक

गोळीबार प्रकरणी राजस्थानमधील कोटा येथे रेहान उर्फ सुक्का, हृतिक कुर्मी उर्फ रोशन आणि एका अल्पवयीन मुलाला अटक करण्यात आली आहे. हे तिघेही पुणे-जयपूर सुपरफास्ट ट्रेनच्या जनरल कोचमधून प्रवास करत होते. पोलिसांनी सांगितले की, मुंबई पोलिसांकडून माहिती मिळाल्यानंतर कोटा पोलिसांनी सुमारे 15 मिनिटांत कारवाई करून त्यांना अटक केली. कोटा पोलिसांच्या प्राथमिक तपासात असे समोर आले आहे की, अनिल पंडितने या गुन्ह्यासाठी रेहानशी संपर्क साधला होता. रेहानने एका अल्पवयीन मुलाला सोबत घेतले होते, तर मुंबईत राहणाऱ्या हृतिकला तो परिसर माहीत होता. पोलिसांच्या म्हणण्यानुसार, त्या तिघांनी पैशांसाठी गोळीबार केला. टायगरला ठार मारण्याचा त्यांचा हेतू नव्हता, तर त्याला घाबरवण्याचा होता.

तपास पथकाच्या म्हणण्यानुसार, गोळीबारात वापरलेली शस्त्रे अद्याप सापडलेली नाहीत. आरोपींची चौकशी करून शस्त्रे कुठे लपवली होती, हे शोधण्याचे प्रयत्न सुरू आहेत. या घटनेच्या मागे नेमकं कोण आहे आणि आरोपींना कोणी मदत केली, याचाही पोलीस तपास करत आहेत.