पतीकडून गर्भात वाढत असलेल्या बाळाच्या DNA टेस्टचा आग्रह, गरोदर महिलेचं भयंकर पाऊल

Crime News : तेलंगणातील मेडक जिल्ह्यात पतीकडून पत्नीच्या गर्भात वाढत असलेल्या बाळाच्या पितृत्वाबाबत संशय घेतला जात असल्याच्या आरोपानंतर एका 23 वर्षीय महिलेने आत्महत्या केल्याची घटना समोर आली आहे. जी सुष्मिता असे या महिलेचे नाव असून, तिच्या कुटुंबीयांनी पती जी अभिलाष याच्यावर मानसिक आणि शारीरिक छळ केल्याचा आरोप केला आहे. सुष्मिता पाच महिन्यांची गर्भवती होती. तिच्या पतीकडून बाळाच्या पितृत्वाची खात्री करण्यासाठी डीएनए चाचणी करण्याचा आग्रह धरला जात होता, असा आरोप कुटुंबीयांनी केला आहे. या प्रकरणी पोलिसांनी पती आणि सासूला अटक केली असून, पुढील तपास सुरू आहे.