बदला कसा घ्यायचा? रुग्णालयात स्क्रिप्ट लिहिली, चिमुरड्यांसमोर आई-बापावर 46 वार; आरोपीचा Encounter

रुग्णालयातून हत्येचा कट आणि चकमकीनंतर आरोपीला बेड्या

या प्रकरणाचा तपास करत असताना पोलिसांनी अत्यंत वेगाने हालचाली केल्या आहेत. मुख्य सूत्रधार फहीम याला पोलिसांनी आधीच तुरुंगात पाठवले असून, मंगळवारी रात्री उशिरा अनस नावाच्या आरोपीला चकमकीनंतर अटक करण्यात आली आहे. अगवानपूर परिसरात झालेल्या या कारवाईत आरोपीने पोलिसांवर गोळीबार केला, ज्याला प्रत्युत्तर देताना पोलिसांच्या गोळीने तो जखमी झाला. पोलिसांनी त्याच्याकडून अवैध शस्त्रे जप्त केली आहेत. पोलीस तपासात समोर आले की, फहीमने राजाला एक प्लॉट विकला होता आणि त्यातील 24 हजार रुपयांच्या थकबाकीवरून 19 एप्रिल रोजी वाद झाला होता. या वादात राजाने फहीमच्या डोक्यात वीट मारली होती, ज्याचा बदला घेण्यासाठी फहीमने रुग्णालयातून आपल्या मुलाला आणि सहकाऱ्यांना चिथावणी दिली होती.

सन्मानाची खोटी लढाई आणि तीन निरागस मुलांचे अनाथपण

घटनेच्या मुळाशी केवळ 24 हजार रुपयांचा आर्थिक व्यवहार आणि सन्मानाची खोटी लढाई होती. फहीमने रुग्णालयात उपचार घेत असताना आपल्या मुलाला आणि साथीदार आरिफला राजाला अद्दल घडवण्यासाठी उकसवले. आरिफ हा समाजवादी पक्षाच्या माजी नेत्याचा भाऊ असल्याचे सांगितले जात असून, त्याच्या अटकेसाठी पोलीस पथके रवाना झाली आहेत. फराहच्या शरीरावरही चाकुचे 6 गंभीर वार आढळले असून तिच्या मानेवरील प्रहार जीवघेणा ठरला. एका शुल्लक कारणावरून दोन जीवांचा बळी गेल्याने तीन निष्पाप मुले अनाथ झाली आहेत. पोलिसांनी उर्वरित आरोपींना लवकरच जेरबंद करण्याचे आश्वासन दिले असून या प्रकरणाचा सखोल तपास सुरू आहे.

उत्तर प्रदेशातील या घटनेने वाढत्या गुन्हेगारीवर आणि क्षुल्लक वादातून होणाऱ्या हिंसाचारावर पुन्हा एकदा प्रश्नचिन्ह उभे केले आहे. आरोपी फहीमने आपल्या मुलाचा वापर सूड घेण्यासाठी केल्यामुळे एका कुटुंबासोबतच स्वतःचेही घर उद्ध्वस्त केले आहे. मुरादाबाद पोलीस आता आरिफ आणि इतर फरार आरोपींचा शोध घेत असून, या खटल्यात कठोर शिक्षा मिळावी यासाठी पुरावे गोळा केले जात आहेत. चिमुरड्या मुलांच्या डोळ्यादेखत त्यांच्या पालकांची झालेली ही हत्या समाजातील क्रूरतेचे विदारक दर्शन घडवणारी ठरली आहे.