बीड हादरलं! सासरवाडीत राहणाऱ्या जावयाचा कोणी केला निर्घृण खून? थेट काढला कोथळा..
बीड जिल्ह्यातील माजलगाव तालुक्यातील तालखेड येथे सासरवाडीत राहत असलेल्या 33 वर्षीय युवकाची अत्यंत निर्घृण पद्धतीने हत्या केल्याची धक्कादायक घटना समोर आली आहे.
ADVERTISEMENT
रोहिदास हातागळे | बीड: बीड जिल्ह्यातील माजलगाव तालुक्यातील तालखेड येथे सासरवाडीत राहत असलेल्या 33 वर्षीय युवकाची अज्ञातांनी अत्यंत निर्घृणपणे हत्या केल्याची धक्कादायक घटना सोमवारी उघडकीस आली. मृताच्या गळ्यावर, पोटावर आणि डोक्यावर तीक्ष्ण हत्याराने अनेक वार करण्यात आल्याचे प्राथमिक तपासात समोर आले आहे. मृताच्या पोटावर अत्यंत जोरदारपणे वार करून त्याचा कोथळाच बाहेर काढण्यात आला आहे. दरम्यान, या भीषण हत्येमुळे तालखेड परिसरात एकच खळबळ उडाली आहे.
शेतात जातो सांगून पडलेला घरातून बाहेर
मृत युवकाचे नाव विकास दत्तात्रय वाघमोडे (रा. किट्टी आडगाव) असे आहे. काही वर्षांपूर्वी त्याने तालखेड येथील अरुण नारायण राऊत गुरव यांच्या मुलीशी प्रेमविवाह केला होता. सासू-सासऱ्यांचे निधन झाल्यानंतर विकास वाघमोडे हा गेल्या पाच वर्षांपासून सासरवाडीतच राहत होता. तो सासरच्या शेतीची देखभाल करण्याची जबाबदारी सांभाळत होता.
हे ही वाचा>> 3 नराधमांनी तरुणीला हॉटेलवर नेलं, पीडिता नग्नावस्थेत... व्हिडिओ व्हायरल
रविवारी सकाळी तो नेहमीप्रमाणे शेतात जात असल्याचे सांगून घरातून बाहेर पडला. मात्र, रात्री उशिरापर्यंत तो घरी परतला नाही. त्यामुळे त्याच्या पत्नीसह नातेवाईकांनी त्याचा शोध सुरू केला. परिसरात शोधमोहीम राबवूनही विकासचा काहीच मागमूस लागला नाही.
रक्तबंबाळ अवस्थेत आढळला मृतदेह
सोमवारी सकाळी तालखेडजवळील खंडोबा वडी परिसरात विकास वाघमोडे याचा रक्तबंबाळ अवस्थेतील मृतदेह आढळून आला. घटनेची माहिती मिळताच ग्रामीण पोलिस घटनास्थळी दाखल झाले. पोलिसांनी पंचनामा करून मृतदेह ताब्यात घेतला आणि पुढील तपास सुरू केला.
