IAS पूजा खेडकरांचे आई-वडील गायब; पोलिसांनी दिली महत्त्वाची अपडेट!

पूजा खेडकरांच्या आई मनोरमा खेडकर यांचा जुना व्हिडीओ व्हायरला झाला होता. यामध्ये त्या बंदुक दाखवत एका शेतकऱ्याला धमकावताना दिसल्या. याबाबत संबंधित शेतकऱ्यांनी पुणे जिल्ह्यात मुळशी तालुक्यातील पौड पोलीस स्थानकात तक्रार दिली होती. पण, त्यावेळी पोलिसांनी तक्रार नोंदवून घेतली नाही. पूजा खेडकर प्रकरणात नवनवीन खुलासे होत असताना तिच्या आईचा हा व्हिडीओ व्हायरल झाला. यानंतर पौड पोलिसांनी मनोरमा खेडकर आणि दिलीप खेडकर यांच्याविरूद्ध एफआयआर दाखल केला आहे. 

हेही वाचा : Chhagan Bhujbal : आधी सडकून टीका, अचानक शरद पवारांची घेतली भेट

पुणे ग्रामीणचे पोलीस अधिक्षक पंकज देशमुख यांनी दिलेल्या नवीन माहितीनुसार, आता पूजा यांचे आई-वडील गायब आहेत. त्यांचे फोन बंद असून, अद्याप संपर्क होत नाही आहे. 'आम्ही त्यांच्याशी संपर्क साधण्याचा प्रयत्न करत आहोत. स्थानिक गुन्हे शाखा आणि पोलीस ठाण्याच्या अधिकाऱ्यांसह अनेक पथके पुणे आणि आजूबाजूच्या परिसरात त्यांचा शोध घेत आहेत. आरोपी सापडल्यानंतर त्यांची चौकशी केली जाईल', असंही पोलीस अधिक्षक पंकज देशमुख म्हणाले.

पुणे ग्रामीण पोलिसांनी स्थानिक गुन्हे शाखेची तीन पथके तयार केली आहेत. त्यांच्या मदतीने खेडकर कुटुंबीयांचा शोध घेतला जात आहे. त्यांचे फोन स्वीच ऑफ असल्याने त्यांच्याशी कोणताही संपर्क होत नाही आहे.