सिंधुदुर्ग : 60 दिवसांपासून बेपत्ता असलेल्या 17 वर्षीय मुलीचा मृतदेह सापडला, एकतर्फी प्रेमातून मुलानं जंगलात नेलं अन्...

हेही वाचा : 2 ऑक्टोबर रोजी कोकण भागात पावसाची विश्रांती, तर मराठवाड्यात पावसाची स्थिती नेमकी कशी असेल?

अधिकची माहिती अशी की, कुडाळ तालुक्यातील घावनळे (वायगंणवाडी) येथील 17 वर्षीय दीक्षा बागवे ही गेल्या दोन ऑगस्टपासून बेपत्ता होती. अखेर तिचा मृतदेह सापडला असून अल्पवयीन मुलीचा घातपात करून तिचा निर्घृण खून केल्याप्रकरणी आरोपी कुणाल कृष्णा कुंभार याला अटक करण्यात आली आहे. या प्रकरणी  कुडाळ तालुका न्यायालयाने आरोपीला सहा दिवसांची  पोलीस कोठडी सुनावली आहे. या प्रकरणात पोलीसांनी युवकाला शिताफीने अटक करून आज कुडाळ न्यायालयात हजर केले. तब्बल दोन महिन्यानंतर दीक्षा बागवे याच्या बेपत्ता प्रकरणाचा छडा अखेर कुडाळ पोलिसांनी आज लावला आहे. या हत्या प्रकरणामुळे संपूर्ण सिंधुदुर्ग जिल्ह्यात खळबळ उडाली आहे. मात्र पोलिस प्रशासनाने या घटनेबद्दल कमालीची गुप्तता बाळगून ही कारवाई केली आहे.

घावनळे गावातील ही मुलगी दोन ऑगस्ट रोजी  अचानक  कॉलेजला जाते म्हणून निघाली ती बेपत्ता झाली होती. कुटुंबीयांनी दिलेल्या तक्रारीवरून कुडाळ पोलिसांनी अज्ञात व्यक्तीविरुद्ध अपहरणाचा गुन्हा दाखल केला होता. दोन महिन्यापासून पोलीस आणि नातेवाईक तिचा शोध घेत होते. मात्र, तब्बल दोन महिन्यानंतर पोलिसांच्या तपासात या मुलीचा खून कुणाल कुंभार याने केल्याची धक्कादायक माहिती पुढे आली आहे. या प्रकरणातील संशयित कुणाल कुंभारकडून अजून काय काय माहिती येते? यावर या खूनाची व्याप्ती अवलंबून असणार आहे. माणगाव खोऱ्यातील गोठोस गावातील जंगलात नेऊन गळा दाबून या अल्पवयीन मुलीचा खून केल्याची कबुली आरोपीने दिली आहे.  गोठोस येथील याच बंद मांगरात मागील दरवाजा फोडून आरोपीने 2 ऑगस्ट रोजी मुलीला आतमध्ये नेले आणि तेथेच गळा दाबून खून केला, अशी माहिती आरोपीने दिली आहे. प्रेम प्रकरणातून हा खून झाल्याचा प्राथमिक अंदाज पोलिसांनी वर्तवला आहे. सध्या फॉरेन्सीक एक्स्पर्ट टीम मृतदेहाचा तपास करत आहे.