Navneet Rana : '15 सेकंद पोलीस हटवा, छोट्याला आणि मोठ्याला...', ओवेसींबद्दल राणांचं वादग्रस्त विधान

नवनीत राणा यांचे एक विधान व्हायरल होत आहे. (नवनीत राणा व्हायरल व्हिडिओ ओवेसी). एआयएमआयएम नेते अकबरुद्दीन ओवेसी यांच्या जुन्या वादग्रस्त विधानावर त्यांनी प्रत्युत्तर दिले आहे.

नवनीत राणा ओवेसी बंधूंना काय म्हणाल्या? 

भाजप उमेदवार माधवी लता यांच्या प्रचारासाठी नवनीत राणा ८ मे रोजी हैदराबादमध्ये होत्या. यावेळी त्या म्हणाल्या की,

"छोटा (अकबरुद्दीन ओवेसी) म्हणतो की, 15 मिनिटांसाठी पोलिसांना हटवा आणि आम्ही काय करू शकतो ते दाखवू. मी त्या छोट्याला हेच सांगते की तुला १५ मिनिटे लागतील. पण, आम्हाला फक्त १५ सेकंद लागतील. जर 15 सेकंदांसाठी पोलिसांना हटवले तर छोट्याला (अकबरुद्दीन ओवेसी) आणि मोठ्याला (असदुद्दीन ओवेसी)ते कुठून आले आणि कुठे गेले हे कळणार नाही. आम्हाला फक्त 15 सेकंद लागतील."

हेही वाचा >> दोन्ही राष्ट्रवादी भविष्यात एकत्र येणार? अजित पवारांचे सूचक विधान

नवनीत राणा यांनी त्यांच्या अकाऊंटवर हा व्हिडीओ शेअर केला आहे. महत्त्वाचं म्हणजे राणा यांनी हे ट्विट अकबरुद्दीन ओवेसी आणि असदुद्दीन ओवेसी यांनाही टॅग केले आहे.

नवनीत राणांची निवडणूक आयोगाकडे तक्रार

नवनीत राणा यांच्या या वक्तव्याबाबत एआयएमआयएमचे प्रवक्ते वारिस पठाण यांनी निवडणूक आयोगाकडे कठोर कारवाईची मागणी केली आहे.

हेही वाचा >> 'बाळासाहेब ठाकरेंच्या नकली शिवसेनेची संतान..', आंध्रप्रदेशातून मोदींची ठाकरेंवर जहरी टीका 

'आज तक'शी बोलताना वारिस पठाण म्हणाले की, भाजप नेत्याचे हे विधान निवडणूक आयोगाच्या नियमांचे उल्लंघन करते, कारण यामुळे दोन समुदायांमध्ये तेढ निर्माण होऊ शकते. पठाण म्हणाले की,

"मी जर नवनीत राणांसारखे भाषण केले असते, तर मी तुरुंगात गेलो असतो. पोलिसांना हटवण्याचे वक्तव्य दिल्यानंतर 15 मिनिटांनी अकबरुद्दीन ओवेसी हे स्वत: पोलिसांना शरण गेले होते. 40-42 दिवस ते तुरुंगात राहिले. दहा वर्षे कोर्टात लढले आणि निर्दोष सुटले. नवनीत राणा यांच्यावर निवडणूक आयोग कधी कारवाई करणार आणि त्यांना कधी तुरुंगात पाठवणार? मुस्लिमांच्या विरोधात दररोज विधाने केली जातात पण कारवाई होत नाही."

हैदराबाद लोकसभा मतदारसंघामध्ये भाजपने माधवी लता यांना उमेदवारी दिली आहे. तर असदुद्दीन ओवेसी पुन्हा एकदा मैदानात आहेत. या मतदारसंघात 13 मे रोजी लोकसभा निवडणुकीच्या चौथ्या टप्प्यात मतदान होणार आहे.