CJP Protest: 'ग्यानू काका राजीनामा द्या.. राजीनामा द्या...', शिवाजी पार्कवर जोरदार घोषणाबाजी
मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी CJPच्या आंदोलकांनी शिवाजी पार्कवर जोरदार आंदोलन करत “ग्यानू काका राजीनामा द्या” अशा घोषणा दिल्या.
ADVERTISEMENT
मुंबई: “ग्यानू काका राजीनामा द्या... राजीनामा द्या...” अशा जोरदार घोषणांनी गांधी जयंतीच्या दिवशी मुंबईतील शिवाजी पार्क परिसर दणाणून गेला. मुख्य निवडणूक आयुक्त (CEC) ज्ञानेश कुमार यांच्या राजीनाम्याच्या मागणीसाठी कॉक्रोच जनता पार्टी (CJP) कडून आंदोलनाची हाक देण्यात आली होती. पोलिसांनी या आंदोलनाला परवानगी नाकारली असतानाही CJPच्या आंदोलकांनी शिवाजी पार्क परिसरात आंदोलन करत ज्ञानेश कुमार यांच्या राजीनाम्याची मागणी केली.
या आंदोलनादरम्यान CJPच्या कार्यकर्त्यांकडून निवडणूक आयोगाच्या कामकाजावर प्रश्न उपस्थित करण्यात आले. नव्या मतदारांच्या नोंदणीचा मुद्दाही आंदोलकांनी उपस्थित केला. फॉर्म 6 मुळे नव्या मतदारांची नोंदणी होत नसल्याचा आरोप CJPच्या आंदोलकांनी केला. तसेच, सरकार Gen Z म्हणजेच तरुण मतदारांना घाबरत असल्याचा दावाही आंदोलकांकडून करण्यात आला.
ज्ञानेश कुमारांच्या राजीनाम्याची मागणी
CJPचे संस्थापक अभिजीत दीपके यांनी मुख्य निवडणूक आयुक्त ज्ञानेश कुमार यांच्या राजीनाम्याची मागणी केली आहे. CJPच्या आंदोलनाची सुरुवात मुंबईतील शिवाजी पार्कपासून करून पुढे देशातील इतर शहरांमध्ये आंदोलन नेण्याची घोषणा करण्यात आली आहे. आंदोलन ज्ञानेश कुमार यांनी राजीनामा देईपर्यंत सुरू ठेवण्याचा निर्धार दीपके यांनी व्यक्त केला आहे.
हे ही वाचा>> CJP Protest LIVE : सीजेपीच्या आंदोलनात देशभक्तीपर गीते, गांधी-आंबेडकरांच्या नावाने घोषणाबाजी
CJPने निवडणूक प्रक्रियेत अधिक पारदर्शकता असावी, अशी मागणीही केली आहे. पुढील मुख्य निवडणूक आयुक्तांची नियुक्ती पारदर्शक पद्धतीने व्हावी आणि या प्रक्रियेत नागरी समाजाचा सहभाग असावा, अशी भूमिका अभिजीत दीपके यांनी मांडली आहे.