संगीत देवबाभळी या नाटकाद्वारे मराठी घराघरात पोहोचलेली अभिनेत्री शुभांगी सदावर्ते लवकरच आता एका वेगळ्या भूमिकेतून प्रेक्षकांच्या समोर येणार आहे. महाराष्ट्राच्या सुरक्षिततेसाठी ऑन ड्युटी चोवीस तास असणाऱ्या महाराष्ट्र पोलिसांची शौर्यगाथा ‘नवे लक्ष्य’ या मालिकेत शुभांगी प्रमुख भूमिका साकारणार आहे.
या मालिकेत अभिनेत्री शुभांगी पीआय मोक्षदा मनोहर मोहिते ही व्यक्तिरेखा साकारणार आहे. संगीत देवबाभळी या नाटकाद्वारे शुभांगीने प्रेक्षकांच्या मनावर अधिराज्य गाजवलं होतं. त्यामुळे ‘नवे लक्ष्य’ या मालिकेतील मोक्षदा या व्यक्तिरेखेलाही प्रेक्षकांचा भरभरुन प्रतिसाद मिळेल अशी आशा तिला आहे. शिवाय तिचे चाहतेही देखील तिला वेगळ्या भूमिकेत पाहण्यासाठी उत्सुक आहेत.
या भूमिकेविषयी सांगताना शुभांगी म्हणाली, “मोक्षदा मोहिते असं माझ्या व्यक्तिरेखेचं नाव आहे. ती प्रत्येक प्रसंगांचा, घटनेचा आणि गुन्ह्यांचा सगळ्या बाजूने विचार करते आणि मगच तिचं मत मांडते. स्त्रियांवर होणाऱ्या अत्याचाराबाबत तिच्या मनात प्रचंड राग आहे. त्यामुळे गुन्हेगारांमध्ये तिची दहशत आहे.”
शुभांगी पुढे म्हणते, “खऱ्या आयुष्यातही जर अन्यायाचा प्रसंग माझ्यासमोर आला तर माझ्यातली मोक्षदा जागी होते. अगदी आठ दिवसांपूर्वीचाच प्रसंग सांगायचा तर शूटिंग संपवून उशिरा मी घरी येण्यासाठी रिक्षा बुक केली. त्या रिक्षावाल्याने मला जवळपास एक तास चुकीच्या दिशेने फिरवलं. मी त्याला त्याच्या चुकीची जाणीव करुन देण्यासाठी रौद्ररुप धारण केलं आणि त्याला पैसेच दिले नाहीत. अशा परिस्थितीत घाबरुन न जाता धैर्याने सामना करायला हवा असं मला वाटतं.
“मोक्षदा ही व्यक्तिरेखा मनाला खूपच भावणारी आहे. पोलिसांविषयी माझ्या मनात आदर होताच ही मालिका करताना हा आदर आणखी वाढलाय. वर्दीची खरी किंमत जेव्हा ती शूटिंगच्या निमित्ताने आम्ही धारण करतो तेव्हा कळते. पोलिसांच्या मेहनतीची आणि त्यांच्या जबाबदारीची जाणीव होते. ‘नवे लक्ष्य’च्या प्रोमोजना भरभरुन प्रतिसाद मिळतो आहे याचा आनंद होत” असल्याचं शुभांगीने सांगितलंय.
