Tunisha Sharma Death reason News : छोट्या पडद्यावरील लोकप्रिय अभिनेत्री तुनिषा शर्माने शुटिंगनंतर मेकअप रुममध्येच स्वतःच्या आयुष्याचा शेवट केला. तुनिषाने उचलेल्या टोकाच्या पावलाने मनोरंजन विश्वात हळहळ व्यक्त होत असून, तुनिषा शर्माचा मृत्यू नेमका कोणत्या कारणामुळे झाला, याची माहिती पोस्टमार्टम रिपोर्टमधून समोर आलीये. (What is the reason behind Tunisha Sharma death?)
टीव्ही अभिनेत्री तुनिषा शर्माने शनिवारी (24 डिसेंबर) आयुष्याला कायमचा पूर्णविराम दिला. तुनिषा शर्माने सेटवरील मेकअप रुममध्येच गळफास घेऊन आत्महत्या केली. सह कलाकार शीजान मोहम्मद खानच्या मेकअप रुममध्ये तिचा मृतदेह टांगलेल्या अवस्थेत आढळून आला होता.
छोट्या पडद्यावरील अभिनेत्री तुनिषा शर्माने कोणत्या कारणामुळे आत्महत्या केली, हे अद्याप समोर आलेलं नसलं. तरी ती काही दिवसांपासून तणावाखाली होती, अशी माहिती सूत्रांकडून मिळालीये. तुनिषा शर्मा तिचा सह कलाकार शीजान मोहम्मद खान यांच्यासोबत रिलेशनशिपमध्ये होती. त्याचं ब्रेकअप झालं होतं. त्यानंतर ती तणावाखाली होती.
तुनिषा शर्माचा मृतदेह मेकअप रुममधून रात्री मुंबईतील जेजे रुग्णालयात पोस्टमार्टम साठी नेण्यात आला होता. तुनिषा शर्माच्या मृतदेहाचं पोस्टमार्टम 4 ते 5 डॉक्टरांच्या उपस्थित करण्यात आलं. पोस्टमार्टमचं चित्रीकरणही करण्यात आलेलं आहे.
पोस्टमार्टम रिपोर्टनुसार तुनिषा शर्माचा मृत्यू श्वास गुदमरल्याने झाला. तुनिषा शर्माच्या शरीरावर कोणत्याही खुणा आढळून आलेल्या नाहीत. गळफास लावल्यानं श्वास रोखला गेला आणि तुनिषाचा मृत्यू झाला. तुनिषा प्रेग्नंट असल्याची चर्चा पोलिसांनी फेटाळून लावली आहे.
तुनिषाच्या पार्थिवावर 4 ते 4.30 वाजेच्या सुमारास मीरा रोड स्मशानभूमीत अंत्यसंस्कार करण्यात येणार आहे.
तुनिषा शर्मा 20 वर्षांची होती. तिच्या अभिनयाच्या कारकीर्दीची नुकतीच सुरूवात झाली होती. त्यातच तिने टोकाचं पाऊल उचलत आयुष्य संपवल्यानं तिच्या कुटुंबियांसह चाहत्यांना मोठा धक्का बसलाय.
सुत्रांनी दिलेल्या माहितीनुसार तुनिषा शर्मा शनिवारी (24 डिसेंबर) तिचा मालिकेतील सह कलाकार शीजान मोहम्मद खानच्या मेकअप रुममध्ये गेली होती. शीजान शुटिंग करून मेकअप रुमजवळ आल्यानंतर आतून दरवाजा बंद होता. आवाज देऊन प्रतिसाद न मिळाल्यानं शीजानने दरवाजा तोडला.
दरवाजा तोडल्यानंतर तुनिषा शर्मा बेशुद्ध अवस्थेत आढळून आली. त्यानंतर तिला रुग्णालयात दाखल करण्यात आलं. त्या आधीच तिचा मृत्यू झालेला होता. या प्रकरणात पोलिसांनी तिचा सह कलाकार आणि एक्स बॉयफ्रेंड शीजान मोहम्मद खानविरुद्ध गुन्हा दाखल केलाय आणि त्याची चौकशी करत आहेत.
तिच्या (तुनिषा शर्मा) आईने पोलिसांत दिलेल्या तक्रारीत आरोप केलाय की, 'तुनिषा शर्माचे (वय 24) तिचा सह कलाकार शीजान मोहम्मद खान यांच्याबरोबर प्रेमसंबंध होते. परंतु 15 दिवसांपूर्वी शीजानने तुनिषा शर्मासोबत ब्रेकअप केलं. तिला सोडून दिल्यामुळे तुनिषा शर्मा नैराश्यामध्ये होती. त्याच कारणामुळे तुनिषाने नायगाव कामण येथील सेटवरील रेस्ट रुममध्ये (मेकअप रुम) गळफास घेऊन आत्महत्या केली.'
