जपानचे माजी पंतप्रधान शिंजो आबे यांचं निधन, भाषण सुरू असतानाच आरोपीने झाडल्या गोळ्या

माजी पंतप्रधान शिंजो आबे यांच्यावर आज सकाळी दोन गोळ्या झाडण्यात आल्या होत्या. गोळी लागल्याने त्यांना प्रचंड रक्तस्त्राव झाला होता. त्यामुळे त्यांची प्रकृती गंभीर बनली होती. गोळी लागल्याने त्यांना ह्रदयविकाराचा झटकाही आला होता.

गोळीबारात जखमी झालेल्या शिंजो आबे यांना तातडीने रुग्णालयात दाखल करण्यात आलं. त्यांना वाचवण्यासाठी डॉक्टरांचे शर्थीचे प्रयत्न सुरू होते. मात्र, डॉक्टरांना यश आलं नाही. उपचार सुरू असतानाच त्यांचं निधन झालं.

माजी पंतप्रधान शिंजो आबे यांच्यावर गोळ्या झाडणाऱ्या आरोपीला पोलिसांनी लगेच अटक केली. घटनास्थळावरून आरोपीला ताब्यात घेण्यात आलं होतं. पोलिसांनी दिलेल्या माहितीनुसार हल्लेखोराने सांगितलं की, ‘शिंजो आबे यांच्या अनेक मतांशी मी सहमत नव्हतो आणि त्यामुळेच मी त्यांना मारलं.’