मनसेकडून शिवसेना भवनासमोर हनुमान चालीसा पठण, यशवंत किल्लेदारांना पोलिसांनी घेतलं ताब्यात

जाणून घ्या नेमकं काय काय घडलं शिवसेना भवनासमोर? काय म्हणाले यशवंत किल्लेदार?
मनसेकडून शिवसेना भवनासमोर हनुमान चालीसा पठण, यशवंत किल्लेदारांना पोलिसांनी घेतलं ताब्यात
फोटो सौजन्य-ANI

राज ठाकरेंनी त्यांच्या गुढीपाडव्याच्या भाषणात मशिदीवरचे भोंगे बंद करा अन्यथा आम्हाला हनुमान चालीसा पठण करावं लागेल असा इशारा दिला होता. त्यानंतर ठिकठिकाणी हनुमान चालीसा पठण झालंही होतं. आज रामनवमीच्या मुहूर्तावर मनसेने दादरच्या शिवसेना भवनासमोर हनुमान चालीसा पठण आणि धार्मिक गाणी सुरू केली. त्यानंतर पोलीस तिथे तातडीने पोहचले. त्यांनी गाणी वाजवणारी गाडी जप्त केली आहे. त्याचप्रमाणे मनसेचे नेते यशवंत किल्लेदार यांनाही ताब्यात घेतलं आहे.

मनसेचे नेते यशवंत किल्लेदार यांना पोलिसांनी ताब्यात घेतलं आहे. तसंच ज्या कारवर लाऊड स्पीकर होते आणि गाणी वाजवली जात होती ती कारही पोलिसांनी जप्त केली आहे. मशिदींवरच्या भोंग्यावर बंदी आणा अन्य़था आम्हाला हनुमान चालीसा सुरू करावी लागेल असा इशारा राज ठाकरेंनी दिला होता. त्यानंतर ठिकठिकाणी हनुमान चालीसा पठण करण्यात आलं होतं. आज थेट दादरच्या शिवसेना भवनासमोरच हनुमान चालीसा पठण करण्यात आलं. तसंच धार्मिक गाणीही वाजवण्यात आली. त्यानंतर यशवंत किल्लेदार यांना ताब्यात घेण्यात आलं आहे.

काय म्हणाले यशवंत किल्लेदार?

रामनवमीचा सण आहे, तो सण साजरा करण्याच्या उद्देशानेच आम्ही हनुमान चालीसा पठण आणि गाणी वाजवली होती. मात्र आता आम्हाला तो सणही साजरा करायला देत नाहीत. पोलीस मला घेऊन शिवाजी पार्क पोलीस ठाण्यात जात आहेत ठीक आहे. मात्र पोलीस काय कारवाई करतात ते मी पाहतो. ही लोकशाही आहे का? महाराष्ट्रात हेच रामराज्य म्हणायचं का? हा आमचा प्रश्न आहे. अशा पद्धतीने जी कारवाई करण्यात आली आहे त्याचा आम्ही निषेध करतो असंही यशवंत किल्लेदार यांनी म्हटलं आहे.

मशिदीवरील भोंग्यावरुन राज ठाकरे काय म्हणाले होते?

'माझी पंतप्रधानांना विनंती आहे. ईडीच्या, आयकरच्या धाडी टाकत आहात ना... आमच्या पोलिसांना विचारा, त्यांच्याकडे सोर्स आहे. झोपडपट्ट्यांमध्ये असलेल्या मदरशांमध्ये एकदा धाडी टाका. तुम्हाला काय काय हाताला लागेल, ते कळेल. आपल्याला पाकिस्तानची गरजच नाही. कशाला हवाय पाकिस्तान?'

'उद्या जर काही घडलं, तर आतलं आवरता आवरता नाकीनऊ येतील इतक्या गोष्टी आतमध्ये भरलेल्या आहेत. आमचं लक्ष नाहीये. आम्हाला मतं हवीत. आम्हीच त्या झोपडपट्ट्या, मदरसे वाढवत आहोत."

'अनेक मदरसे असे आहेत की जिथे काय घडतंय, तेच समजत नाही. ही सगळी पाकिस्तानच्या प्रोत्साहनामुळे आलेली आणि आपल्या लोकांनी स्वीकारलेली ही लोकं आहेत. नगरसेवक, आमदार, खासदारांना याच्याशी काही घेणंदेणं नाही. ते कशात लागले, आधार-रेशन कार्ड घेऊन जा आणि आमचीच मार. त्यांना सगळ्या गोष्टी पुरवणारे आमचेच.'

'एक दिवस असा येईल की त्यावेळी सगळ्यांचे डोळे उघडतील. काय करून ठेवलं म्हणून. एकदा पोलिसांशी बोलून बघा. कानोसा घ्या. तुम्हाला धडकी भरेल. आमचं कुणाचं लक्ष नाही.'

'मशिदीवर लागणारे भोंगे खाली उतरवावे लागतील. सरकारला हा निर्णय घ्यावा लागेल. नाहीतर आज आणि आता सांगतोय, ज्या मशिदीबाहेर भोंगे लागतील. त्याच्या दुप्पट स्पीकर लावायचे आणि हनुमान चालीसा लावायची.'

Related Stories

No stories found.