सोलापूर: ओवेसी ‘त्या’ कारमधून आले, वाहतूक पोलिसांनी ठोठावला 200 रुपयांचा दंड; नेमकं काय घडलं?

ऑल इंडिया मजलिस-ए-इत्तेहादुल मुस्लिमीनचे अध्यक्ष असदुद्दीन ओवेसी (AIMIM Chief Asaduddin Owaisi)हे मंगळवारी (23 नोव्हेंबर) सोलापूर दौऱ्यावर आले होते. जिथे त्यांच्याकडून सोलापूर शहर वाहतूक पोलिसांनी 200 रुपयांचा दंड वसूल केल्याची माहिती नुकतीच समोर आली आहे.

सोलापूरमध्ये लवकरच महापालिका निवडणुका पार पडणार आहे. याच पार्श्वभूमीवर मंगळवारी (23 नोव्हेंबर) MIM पक्षाचा मेळावा आयोजित करण्यात आला होता. ज्यासाठी ओवेसी हे स्वत: सोलापूरमध्ये आले होते. पण यावेळी ते नंबर प्लेट नसलेल्या कारमधून आले आणि हीच गोष्ट जेव्हा वाहतूक पोलिसांच्या लक्षात आली तेव्हा त्यांनी ओवेसींच्या ड्रायव्हरकडून 200 रुपयांचा दंड वसूल केला.

सोलापूर येथे आल्यानंतर ओवेसी हे शासकीय विश्रामगृहात उतरले होते. जिथे पोहतचात शहर पोलिसांनी त्यांच्या गाडीला नंबर प्लेट नसल्याने दंडात्मक कारवाई केली. सेंट्रल मोटार व्हेकल रुल 50/177 नुसार कारवाई करत त्यांना 200 रुपयांचा दंड ठोठावण्यात आला.