मास्क, हेल्मेट न घालता बाइक राइड, विवेक ओबेरॉयवर पोलिसांची कारवाई

मुंबई: बॉलिवूड अभिनेता विवेक ओबेरॉयने वाहतुकीचे नियम तोडल्याप्रकरणी त्याच्यांवर मुंबई ट्रॅफिक पोलिसांकडून कारवाई करण्यात आली आहे. तसंच सार्वजनिक स्थळी मास्क न लावल्याने देखील त्याच्याविरोधात गुन्हा दाखल करण्यात आला आहे. विवेक ओबेरॉयने नुकताच एक व्हिडिओ सोशल मीडियावर शेअर केला होता ज्यामध्ये तो वाहतुकीचे नियम तोडताना दिसत आहे. 14 फेब्रुवारीला बाइक चालवत असल्याचा हा व्हिडिओ विवेकने शेअर केला होता. यावेळी व्हिडिओत विवेक फिल्मी स्टाईलमध्ये बाइक चालवत असल्याचं दिसून आलं. पण तेव्हा त्याने हेल्मेट घातलं नसल्याने मुंबई ट्रॅफिक पोलिसांनी त्याच्यावर तात्काळ कारवाई करत त्याला 500 रुपयांचा दंड ठोठावला आहे. यासाठी त्याला ई-चालान बजावण्यात आलं आहे. त्याला हे ई-चालान काल (19 फेब्रुवारी) संध्याकाळी 7 वाजेच्या सुमारास बजावण्यात आलं आहे.