Jalgaon district bank: एकनाथ खडसेंचा गुलाबराव पाटलांकडून ‘कार्यक्रम’

Eknath Khadse Jalgaon district bank : जळगाव जिल्ह्यातील राजकारणाने पुन्हा एकदा राज्याचं लक्ष वेधून घेतलं. याला कारण ठरलं जळगाव जिल्हा बँक निवडणूक. जिल्हा बँकेच्या निवडणुकीत राष्ट्रवादी काँग्रसेचे नेते एकनाथ खडसेंना मोठा धक्का बसलाय. हे घडलं ते राष्ट्रवादीतील बंडखोरीमुळे. खडसेंना जिल्हा बँक का गमवावी लागली? याचे मास्टरमाईंड ठरलेत शिंदेंच्या गोटातले गुलाबराव पाटील. पाटलांच्या गेममुळे जळगावमध्ये बाजी पलटली.

जळगाव जिल्हा बॅके अध्यक्षपदासाठी महाविकास आघाडीकडून राष्ट्रवादीचे रवींद्र पाटील यांचे नाव निश्चित झाले असतानाही राष्ट्रवादीचे संजय पवार यांनी बंडखोरी करत आयत्या वेळी शिंदे गटाच्या मदतीने अध्यक्षपदासाठी अर्ज भरला अन् इथेच कार्यक्रम झाला. कारण या निवडणुकीत गुप्त पद्धतीने मतदान झालं. संजय पवार यांना ११ मते पडल्याने अध्यक्षपदाची माळ त्यांच्या गळ्यात पडली. संजय पवार यांची अध्यक्षपदी झालेली निवड ही राष्ट्रवादी काँग्रेस पक्षासह महाविकास आघाडीला मोठा धक्का मानला जात असून राजकीय वर्तुळात मोठी खळबळ उडाली आहे.

महाविकास आघाडी फुटली, खडसेंना दुसरा धक्का

जळगाव जिल्हा बँक अध्यक्ष पदाच्या निवडणुकीत राष्ट्रवादीने जिल्हाध्यक्ष रवींद्र पाटील यांचं नाव निश्चित करण्यात आलं. दरम्यान, संजय पवार यांनी शिंदे गटाची मदत घेतली. त्यामुळे निवडणुकीत चुरस निर्माण झाली होती. राष्ट्रवादी काँग्रेसमध्येच बंडखोरी झाल्यानं निकालाची उत्सुकता वाढली होती. एकूण 21 मतांपैकी 11 मते ही संजय पवार यांना, तर 10 मते रवींद्र पाटील यांना पडली.