Vaccination चा वेग वाढणार, जुलै महिन्यापर्यंत 14 कोटी डोसचं उत्पादन होणार

भारतात लसींचा तुटवडा भासतो आहे. महाराष्ट्रात तर 18 ते 44 या वयोगटासाठीचं लसीकरण तूर्तास स्थगित करण्याची वेळ आली आहे. अशात लसी कधी उपलब्ध होतील हा प्रश्न आपल्यापुढे आहे. त्यात आता केंद्र सरकारने सुप्रीम कोर्टात सादर केलेल्या एका अहवालात जुलै 2021 पर्यंत 14 कोटी लसींचं उत्पादन होईल असं म्हटलं आहे. यामध्ये त्यांनी आयात केल्या जाणाऱ्या लसींची संख्या समाविष्ट केलेली नाही.

Maharashtra Vaccination: लसीकरण कधीपर्यंत सुरळीत होणार?, महाराष्ट्रातील जनतेचा सवाल!

9 मे रोजी जो अहवाल सुप्रीम कोर्टात सादर करण्यात आला त्यामध्ये केंद्र सरकारने हे स्पष्ट केलं आहे की भारतात कोव्हिशिल्ड, कोव्हॅक्सिन आणि स्पुटनिक व्ही या तीन लसींचं उत्पादन 14 कोटींपर्यंत जाईल. जुलै 2021 या महिन्यापर्यंत हे उत्पादन इतकं वाढेल. केंद्र सरकारने सांगितल्याप्रमाणे जर उत्पादन इतकं वाढलं तर भारताला रोज 46 लाख लसी सरासरी मिळू शकणार आहेत. 16 जानेवारीला भारतात सर्वात मोठ्या लसीकरण मोहिमेला सुरूवात झाली. आत्तापर्यंत 17.27 कोटी लोकांना कोरोना प्रतिबंधक लस देण्यात आली आहे. 16 जानेवारीपासून आत्तापर्यंतचा विचार केला तर मागच्या साधारण 115 दिवसात भारताला दररोज 15 लाख डोस देता आले आहेत. जर 14 कोटी डोसची निर्मिती झाली तर आत्तापेक्षा तेव्हा रोज तिप्पट लसींचे डोस भारताला देता येणार आहेत.

महाराष्ट्रातला Lockdown संपेल का? कोरोनाची स्थिती काय? डॉ. राहुल पंडित यांनी दिलं उत्तर

केंद्र सरकारच्या प्रतिज्ञापत्रातील माहितीनुसार हे समजलं आहे की सिरम इन्स्टि्युटने त्यांच्या लसींचं उत्पादन हे 5 कोटी लसी प्रति महिना यावरून साडेसहा कोटी प्रति महिना इतकं वाढवलं आहे. जुलै 2021 पर्यंत हे उत्पादन आणखी वाढेल अशीही आशा आहे. भारत बायोटेकने त्यांच्या कोव्हॅक्सिन या लसीचं उत्पादन 90 लाख डोस प्रति महिना यावरून 2 कोटी डोस प्रति महिना इतकं वाढवलं आहे. जुलै महिन्यापर्यंत हे प्रमाण 5.5 कोटी डोस प्रति महिना इतकं वाढेल अशी अपेक्षा आहे. तर स्पुटनिक व्ही या लसीचं उत्पादन प्रति महिना 30 लाख डोस यावरून 1.2 कोटी डोस प्रति महिना इतकं जुलै पर्यंत वाढवलं जाईल.

केंद्र सरकारने कोर्टाला हेदेखील सांगितलं आहे की 2020 या वर्षाच्या शेवटच्या तिमाहीपासूनच आम्ही विदेशातील लस उत्पादकांना देशात लसी उपलब्ध करून देण्यासंबंधी चर्चा करतो आहोत. इतर देशांसोबत सुरू असलेली बातचीत ही काहीशी गुंतागुंतीची प्रक्रिया आहे. तरीही आम्ही आमच्या सर्व संसधानांचा वापर करून बाहेरील लसीही कशा उपलब्ध होतील यासाठी युद्ध पातळीवर प्रयत्न करतो आहोत.