दाऊदची नजर भारतावर कायम, अजुनही खंडणीचं रॅकेट चालवत असल्याची ‘ईडी’च्या सूत्रांची माहिती

भारत आणि आखाती देशांचा विचार केला असता सट्टेबाजी हा दाऊदच्या गँगचा उत्पन्नाचा प्रमुख स्त्रोत असल्याचं ईडीच्या सूत्रांनी सांगितलं. हवालाच्या माध्यमातून हा पैसा दाऊद भारतामधून आखाती देशांमध्ये वळवत असल्याचं समोर आलंय. गेल्या काही वर्षांपासून दाऊदची गँग भारतात रिअल इस्टेट क्षेत्रात आपली दहशत पसरवण्याचा प्रयत्न करत असून दाऊदचे काही हस्तक अजुनही भारतात त्याच्या नावाने खंडणी गोळा करण्याचं काम करत असल्याचं ईडीने सांगितलं.

ईडी दाऊद इब्राहीमचा भाऊ इक्बाल कासकरची चौकशी करणार असून गरज पडल्यास ईडी इक्बाल कासकरला ताब्यात घेऊन दाऊदच्या आर्थिक व्यवहारांविषयी माहिती घेणार असल्याचं कळतंय. मनी लाँड्रींगच्या माध्यमातून देशातील कायदा आणि सुव्यवस्था बिघडवल्याच्या आरोपाखाली ईडीने गेल्या काही दिवसांत दाऊत आणि छोटा शकीलच्या समर्थकांच्या मालमत्तावर कारवाईचा फास आवळायला सुरुवात केली आहे.

इक्बाल कासकरची कस्टडी मिळावी यासाठी ईडी न्यायालयात अर्ज करणार असल्याचंही कळतंय. २०१७ साली ठाणे पोलिसांच्या क्राईम ब्रांचने दाखल केलेल्या खंडणीच्या गुन्ह्यात इक्बाल कासकर सध्या न्यायालयीन कोठडीत आहे. ईडीने दाऊद इब्राहीमची बहिण हसीना पारकरच्या नागपाडा येथील अड्ड्यांवर छापेमारी केल्याचं कळतंय. हसीना पारकरसोबत ईडीने छोटा शकीलचा मेव्हणा सलीम फ्रुटचीही ईडीने चौकशी केल्याचं कळतंय.