Nawab Malik यांना ईडीचा दणका, संपत्ती जप्त करण्यास परवानगी

ADVERTISEMENT

Mumbaitak
social share
google news

राष्ट्रवादीचे नेते आणि माजी मंत्री नवाब मलिक यांना ईडीने आणखी एक दणका दिला आहे. मलिक यांची संपत्ती जप्त करण्याची संमती ईडीला मिळाली आहे. त्यामुळे हा नवाब मलिक यांच्यासाठी मोठा धक्का मानला जातो आहे. नवाब मलिक आणि त्यांच्या नातेवाईकांच्या संपत्तीवर टाच येणार आहे. मुंबईतल्या गोवावाला कंपाऊंडमधील जमिनीचा भाग, कुर्ला पश्चिम या ठिकाणी असलेल्या तीन फ्लॅट, वांद्रे पश्चिम या ठिकाणी दोन फ्लॅट आणि उस्मानाबाद जिल्ह्यातील १४७ एकर शेत जमिनीचा समावेश आहे. या मालमत्तांवर टाच आणण्यासाठी ईडीचे अधिकारी कायदेशीर सल्लामसलत करत आहेत.

फरार अंडरवर्ल्ड डॉन दाऊद इब्राहिम याची दिवंगत बहीण हसीना पारकरशी संबंधित मनी लाँड्रिंग प्रकरणात ईडीने कारवाई करत फेब्रुवारी महिन्यात नवाब मिलक यांना अटक केली होती. त्यानंतर एप्रिलमध्ये ईडीने मलिक कुटुंबाची मालमत्ता तात्पुरत्या स्वरूपात जप्त केली होती. अधिनिर्णय प्राधिकरणाने या जप्तीला मंजुरी दिली आहे. या मालमत्ता नवाब मलिक, त्यांचे कुटुंबीय, सॉलिडस इन्व्हेस्टमेंट्स प्रायव्हेट लिमिटेड आणि मलिक इन्फ्रास्ट्रक्चर कंपनीशी संबंधित आहेत.

नवाब मलिक सध्या न्यायालयीन कोठडीत असून खासगी रूग्णालयात उपचार घेत आहेत. ईडीला संपत्ती जप्त करण्यास परवानगी मिळाल्याने मलिक कुटुंबीयांच्या अडचणीत वाढ होण्याची शक्यता आहे.

हे वाचलं का?

ADVERTISEMENT

नवाब मलिक यांच्यावर काय आहेत आरोप?

कुर्ल्यातल्या गोवावाला कंपाऊंडमध्ये तीन एकरची जागा आहे. ही जागा मुनिरा प्लंबर यांची होती. मुनिरा यांनी आपली जागा हडपण्यात आल्याची तक्रार मलिक यांच्या विरोधात केली आहे.

नवाब मलिक यांनी दाऊदची बहीण हसीना पारकरसोबत मिळून ही जागा हडपली. याच प्रकरणात त्यांनी आर्थिक गैरव्यवहार केले. त्यानंतर टेरर फंडिंगही त्यांनी केलं आहे का? असेही आरोप करण्यात आले आहेत. हे दोन मुख्य आरोप त्यांच्यावर आहेत. नवाब मलिक हे २३ फेब्रुवारीपासून न्यायालयीन कोठडीतच आहेत.

ADVERTISEMENT

ईडीच्या चार्जशीटमध्ये काय म्हटलं आहे?

ईडीने PMLA कोर्ट मुंबईत ही चार्जशीट दाखल केली आहे. त्या चार्जशीटमध्ये मनी लाँड्रींगच्या प्रकरणाचा उल्लेख करण्यात आला आहे. नवाब मलिक यांनी पैसे हसीना पारकर, सलीम फ्रूट आणि सरदार शहावली खान यांना कॅश आणि चेकच्या स्वरूपात पैसे दिले होते हा उल्लेख करण्यात आला आहे.

ADVERTISEMENT

या जागेचा ताबा नवाब मलिक यांनी बनावट कागदपत्रांच्या आधारे घेतला. त्यांनी या जागेवर कब्जा केल्याचंही या चार्जशीटमध्ये म्हटलं आहे. मागच्या काही वर्षांमध्ये जागेची मालकी असल्याने या जागेवर असलेल्या दुकानं, गाळे यांच्या भाडे रक्कमेतून नवाब मलिक यांना साडेअकरा कोटी रूपये मिळाल्याचंही चार्जशीटमध्ये नमूद केलं आहे.

जे पैसे नवाब मलिक यांना मिळाले, हे पैसे हसीन पारकर, सलीम पटेल आणि शाहवली खान या तिघांना दिल्याचा उल्लेख आहे. शाहवली खानला बॉम्बस्फोटात अटक करण्यात आली आहे. हसीना पारकर दाऊदची बहीण आहे. तर सलीम पटेल उर्फ सलीम फ्रूट हा हसीना पारकरचा ड्रायव्हर होता. हे पैसे दाऊदला किंवा त्याच्या गँगला फिरवण्यात आले असंही चार्जशीटमध्ये नमूद केलं आहे.

    follow whatsapp

    ADVERTISEMENT