शिवसेनेचे ठाणे जिल्हाप्रमुख केदार दिघेंना ‘त्या’ प्रकरणात दिलासा; अटकपूर्व जामीन मंजूर

ठाण्याचे शिवसेना जिल्हाप्रमुख केदार दिघे यांना मुंबई सत्र न्यायालयाने अटकपूर्व जामीन मंजूर केला आहे. एका २३ वर्षीय तरुणीने दिल्लीस्थित उद्योजक रोहित कपूर याच्यावर बलात्कार केल्याचा, तर या बलात्कार प्रकरणी पोलिसांत तक्रार देऊन नये म्हणून केदार दिघेंनी धमकावल्यांचा आरोप केलेला आहे.

एनएम जोशी पोलीस ठाण्यात तक्रार दाखल झाल्यानंतर केदार दिघे यांनी ५ ऑगस्ट रोजी मुंबई सत्र न्यायालयात अटकपूर्व जामीनासाठी धाव घेतली होती. शनिवारी (६ ऑगस्ट) एमएम देशपांडे यांच्या पीठासमोर याचिकेवर सुनावणी झाली.

केदार दिघे यांना अटकपूर्व जामीन देण्यास पीडितेच्या वकिलांनी विरोध केला. या प्रकरणात आधीच केदार दिघेंना मुंबई पोलिसांनी चौकशीसाठी हजर राहण्याबद्दलचं समन्स बजावलेलं आहे. मुंबई सत्र न्यायालयाने पोलिसांना चौकशीसाठी सहकार्य करण्याचे आदेश देत दिघेंना अटकपूर्वी जामीन मंजूर केला.

केदार दिघेंवर, रोहित कपूर आणि पीडित तरुणी

तरुणीने पोलिसांत दिलेल्या तक्रारीत म्हटलं आहे की, मी हॉटेलमध्ये क्लब अॅम्बेसीडर म्हणून काम करते. मी काम करत असलेल्या हॉटेलमध्ये सहा रेस्तराँ आहेत. हॉटेलमध्ये येणाऱ्या व्यक्तींना हॉटेलच्या मेंबरशिप देण्याचं काम आहे. हॉटेलमध्येच माझी ओळख २७ जुलै २०२२ रोजी रात्री ९.४५ वाजता माझी ओळख रोहित कपूरसोबत झाली.

रोहित कपूरला मी हॉटेल मेंबरशिपबद्दल माहिती दिली. त्यांनी अगोदरपासून मेंबर असल्याचं सांगितलं. त्यानंतर त्यांनी मला त्यांचा नंबर दिला. मी त्यांना व्हॉट्स अपवर मेंबरशिप घेण्याबद्दल माहिती पाठवली. २८ जुलै रोजी रात्री साडेबारा वाजता रोहित कपूरने हॉटेलची मेंबरशिप स्वीकारण्याबद्दल मेसेज केला.

आमच्या संवाद झाल्यानंतर रोहित कपूर यांनी मला हॉटेलच्या रुममध्ये डिनर करण्यासाठी येण्याबद्दल विचारलं. मी त्यांना नकार दिला. त्यानंतर मेंबरशिपबद्दल चर्चा करण्यासाठी रोहित कपूरने मला रुममध्ये बोलावलं. पण त्याही वेळी रोहित कपूरला नकार दिला, पण हॉटेल मॅनेजरची परवानगी घेऊन डिनरसाठी येईल, असं सांगितलं.

रोहित कपूरसोबत मी बाय द मिकाँग रेस्तराँमध्ये रात्री ११.३० वाजता डिनर करायला गेले. तिथे मेंबरशिपबद्दल चर्चा झाली. त्यानंतर ते मेंबरशिप घेण्यासाठी तयार झाले. मेंबरशिपचे पैसे घेण्यासाठी त्यांनी मला सोबत येण्यास सांगितलं. मी त्यांच्यासोबत गेले.

त्यांच्या रुममध्ये गेल्यानंतर त्यांनी आतून दरवाजा बंद केला. त्यानंतर रोहित कपूरने माझ्यावर बलात्कार केला. या घटनेमुळे मी हादरले आणि घरी गेले. नोकरीची गरज असल्यानं मी कुणालीही बोलले नाही.

केदार दिघेंनी दिली जिवे मारण्याची धमकी, तरुणीचा आरोप

तरुणीने पुढे तक्रारीत म्हटलं आहे की, या घटनेबद्दल मी माझ्या मित्राला सांगितलं. त्याबरोबर मी रोहित कपूर यांना मेसेज करून चुकीचं कृत्य केल्याचं सांगितलं. माझ्या मित्राने रोहित कपूरशी संपर्क केला. त्यानंतर मला त्यांना खाली बोलावून आणण्यासाठी पाठवलं. मी त्यांना खाली येण्याची विनंती केली. रोहित कपूर माझ्यावर रागावले आणि पैसे दिले. तसेच याबाबत कुठेही वाच्यता न करण्याची धमकी दिली. मी नकार दिल्यानंतर केदार दिघे यांनी मला जिवे मारण्याची धमकी दिली, असं पीडितेनं तक्रारीत म्हटलं आहे.