कोल्हापूर : व्यापाऱ्याला हनी ट्रॅपमध्ये अडकवत लाखो रुपयांना लुटलं, ६ जणांना अटक

कोल्हापुरातील प्रसिद्ध कापड व्यापार्‍याशी एका अनोळखी मुलीनं १५ दिवसांपूर्वी What’s App वरुन चॅटींगद्वारे मैत्री केली. यानंतर या मुलीने व्यापाऱ्याचा विश्वास संपादन करुन त्याला फ्लॅटवर भेटायला बोलावलं. तिथं आल्यानंतर मुलीच्या टोळीतील मित्रांनी त्याला बलात्काराच्या गुन्ह्यात अडकवण्याची धमकी देऊन, त्याच्याच वाहनातून पन्हाळा रस्त्यावरील केर्ली गावानजीक निर्जनस्थळी नेऊन त्याला मारहाण केली. या टोळीने व्यापाऱ्याच्या वाहनातील दीड लाख रुपये आणि सह्या केलेले तीन कोरे चेक काढून घेतले.

यानंतर या टोळीने त्याच्याच गाडीतून कोल्हापुरातील बागल चौक इथल्या मुथ्थूट फायनान्सच्या शाखेत नेलं. व्यापार्‍याच्या अंगावरील दागिने गहाण ठेवायला लावून, त्यावर १ लाख रुपये उचलले. हा प्रकार झाल्यानंतरही या टोळीकडून व्यापाऱ्याला वारंवार लाखो रुपयांची मागणी केली जाऊ लागली. त्यामुळं संबंधित व्यापार्‍यानं संशयितांविरोधात जुना राजवाडा पोलिसांत फिर्याद दिली होती.

यानंतर स्थानिक गुन्हे अन्वेषण शाखेचे पोलिस निरीक्षक प्रमोद जाधव यांच्या मार्गदर्शनाखाली विजय कारंडे, किरण गावडे, कुमार पोतदार, संजय पडवळ, पांडुरंग पाटील, सुप्रिया कात्रट यांनी वेगानं तपास करून, संभाजीनगर इथं टोळीतील प्रमुख सागर माने, सोयल वाटंगी, उमेश साळुंखे, आकाश माळी, लुकमान सोलापुरे, सौरभ चांदणे या सहा जणांना ताब्यात घेतलं. त्यांच्याकडून धारधार शस्त्र, मोबाईल, दुचाकी असं लाखाचं साहित्य जप्त केलं. संबंधित महिलेचाही शोध सुरू आहे.