रमेश लटकेंनी आमदारकीची पहिली निवडणूक एका विधवेविरोधातच लढवली होती…!

अंधेरीचे शिवसेना आमदार रमेश लटके यांच्या निधनानंतर सध्या इथं पोटनिवडणूक होत आहे. या निवडणुकीत शिवसेना (ठाकरे गट) च्यावतीने रमेश लटके यांच्या पत्नी ऋतुजा लटके यांना उमेदवारी देण्यात आली आहे. तर भाजपने मुरजी पटेल यांना मैदानात उतरवलं होतं. मात्र भाजपने मुरजी पटेल यांना निवडणुकीतून ऐनवेळी माघार घ्यायला लावली.

विधवेच्या विरोधात उमेदवार दिल्याने भाजपवर मोठ्या प्रमाणात टीका सुरु होती. भाजपने त्यांचा उमेदवार मागे घ्यावा यासाठी मनसे अध्यक्ष राज ठाकरे यांनी भाजप नेते देवेंद्र फडणवीस यांना पत्र लिहिलं. राष्ट्रवादीचे अध्यक्ष शरद पवारही पुढे सरसावले. त्यामुळे भाजपवर दबाव वाढला आणि मुरजी पटेल यांनी माघार घेतली. पण २२ वर्षापुर्वी खुद्द दिवंगत रमेश लटके यांनीच आपली आमदारकीची पहिली निवडणूक एका विधवा महिलेच्या विरोधात लढवली होती.

रमेश लटके मुळचे कोल्हापूरचे :

दिवंगत रमेश लटके हे मूळचे कोल्हापूर जिल्ह्यातील शाहुवाडी तालुक्यातील धुमकवाडी गावचे रहिवासी. खूप कमी वयात त्यांनी कामासाठी मुंबई गाठली. मुंबईमध्ये ते वडिलांसोबत दूध आणि हार विकण्याचा व्यवसाय करायचे. याच दरम्यान, त्यांचा संपर्क हा शिवसेनेशी आला.

अखिल भारतीय विद्यार्थी सेनेच्या माध्यमातून रमेश लटके हे राज ठाकरेंच्या संपर्कात आले आणि अवघ्या २१ व्या वर्षी त्यांचे निकटवर्तीय बनले. त्यानंतर नगरसेवक, मग आमदार असा त्यांचा राजकारणातला आलेख चढता राहिला. पण एक निवडणूक अशी होती जी रमेश लटकेंनी कोल्हापूरात जाऊन लढली होती.

नेमकं काय झालं होतं?

काँग्रेसचे दिवंगत नेते आणि माजी खासदार उदयसिंहराव गायकवाड हे पूर्वी या मतदारसंघातून आमदार होते. पण ते दिल्लीच्या राजकारणात शिरल्यानंतर १९८० मध्ये बाबासाहेब पाटील इथले आमदार झाले. संजयसिंह गायकवाडही काँग्रेसचेच. पण १९८५ साली संजयसिंह गायकवाड यांनी काँग्रेसमधून बंडखोरी करत अपक्ष म्हणून निवडणुकीत उतरले. गायकवाड निवडणुकीत विजयी झाले.

१९९० च्या निवडणुकीत समीकरण बदलली. आता संजयसिंह गायकवाड काँग्रेसमधून तर बाबासाहेब पाटील शिवसेनेतून उभे होते. पण या निवडणुकीत संजयसिंह गायकवाड यांना पराभव पत्करावा लागला. १९९५ च्या निवडणुकीत त्यांनी पुन्हा बाजी मारली. तोच कित्ता पुढे १९९९ च्या निवडणुकीत गिरवला. दुर्दैवाने २००० मध्ये त्यांचे निधन झाले. यानंतर शाहूवाडीत निवडणूक लागली.

यावेळेस शिवसेनेकडून थेट रमेश लटके यांना शाहूवाडीत पाठवण्यात आलं. रमेश लटके यांचा तिथंही जनसंपर्क होता. त्यावर त्यांनी धनुष्यबाण चिन्हावर पोटनिवडणूक लढवली. कॉंग्रेसकडून दिवंगत आमदार संजयसिंह गायकवाड यांच्या पत्नी संजीवनी गायकवाड यांना तिकीट देण्यात आलं. रमेश लटके यांनी एका विधवेविरोधात निवडणूक लढवली. लटके यांची ती आमदारकीची पहिलीच निवडणूक होती. तशी निवडणुकीची तयारी त्यांनी १९९५ पासूनच केली होती, पण मतदार यादीत नाव नसल्याने त्यांना निवडणूक लढवता आली नाही.

याशिवास शिवसेनेचे पुढे जाऊन आमदार झालेले सत्यजित पाटील (सरुडकर) हे ही गायकवाड आणि लटकेंच्या विरोधात मैदानात उतरले. पण संजयसिंह गायकवाड यांची ताकद मोठी होती. त्याचा फायदा संजीवनी गायकवाड यांना झाला आणि पाटील, लटके यांचा निभाव त्यांच्यापुढे लागला नाही. रमेश लटकेंना या निव़डणुकीत फक्त 11 हजार मतं पडली आणि त्यांचा पराभव झाला. रमेश लटके नंतर मुंबईत परतले आणि मुंबईतले त्यांचे राजकारण सुरु राहिले.