कल्याण : भंडार्लीच्या जागेवर ठाणे मनपाकडून कचरा प्रकल्पाच्या कामाला सुरुवात, ग्रामस्थ आक्रमक

कचरा प्रकल्पाच्या जागेवर जमा होऊन आज स्थानिक नागरिकांनी पालिका अधिकाऱ्यांविरुद्ध घोषणाबाजी केली. ग्रामस्थ रस्त्यावर उतरल्याने शीळ-पनवेल हायवेवर डायघर पोलिसांनी कडेकोड बंदोबस्त ठेवला होता. शिवसेनेचे माजी आमदार सुभाष भोईर यांनी आंदोलनस्थळी भेट देत, ठाणे मनपाने कचऱ्याची विल्हेवाट आपल्याच हद्दीत लावायला हवी असं सांगितलं. ठाणे शहरात मोठमोठी गृहसंकुल उभी राहत असताना त्यांचा कचरा या गावकऱ्यांच्या माथी मारला जातोय याचा निषेध करत असल्याचं सुभाष भोईर म्हणाले.

मनसे आमदार राजू पाटील यांनीही या प्रकरणावर ट्विट करत जिल्ह्याचे पालकमंत्री एकनाथ शिंदे यांना जाब विचारला आहे.

कोरोना वाढत असताना १४ गावात गावकऱ्यांचा विरोध डावलून @TMCaTweetAway ने जबरदस्तीने डंपिंग ग्राऊंडचे काम चालू केले आहे. अजून सर्व परवानग्या आल्या नाहीत,त्यावर होणारा विरोध.असे असताना ही जबरदस्ती कशासाठी ? सत्तेची एवढी मुजोरी बरी नाही.@mieknathshinde @OfficeofUT @AUThackeray pic.twitter.com/pMCkc7lXkv

— Raju Patil ( प्रमोद (राजू) रतन पाटील ) (@rajupatilmanase) January 10, 2022

दरम्यान, ठाणे महानगरपालिकेचे अधिकारी मनिष जोशी यांनी दिलेल्या माहितीनुसार या जागेवर डम्पिंग ग्राऊंड उभारलं जाणार नसून इथे शास्त्रोत्क पद्धतीने कचऱ्याची विल्हेवाट लावली जाणार आहे. आज फक्त प्राथमिक कामाला सुरुवात करण्यात आली आहे. दरम्यान आज हे आंदोलन तुर्तास थांबले असले तरीही भविष्यात हा प्रश्न पेटण्याची चिन्ह आहेत.