Mohan Bhagwat भेट, गाय राष्ट्रीय प्राणी, ओम-अल्लाह एक : अर्शद मदनी अन् वाद…

मौलाना अर्शद मदनी. जमियत उलेमा-ए-हिंद (Jamiat Ulema-e-Hind) या मुस्लीम समाजाच्या सर्वात मोठ्या संघटनेच्या एका गटाचे प्रमुख आणि मुस्लीम समाजातील (Muslim Community) सर्वात चर्चित नेते. नुकतंच या संघटनेच्या दुसऱ्या गटाचे प्रमुख महमूद मदनी यांनी देशात सामाजिक ऐक्य प्रस्थापित करण्यासाठी दिल्लीत एक अधिवेशन आयोजित केलं होतं. याच अधिवेशनात बोलताना मौलाना अर्शद मदनी (Maulana Arshad Madani) यांनी ‘ओम आणि अल्लाह’ एकच असल्याचं आणि पैगंबर आदम हे दोन्ही धर्मीयांचे पूर्वज असल्याचं त्यांनी सांगितलं. त्यांच्या या वक्तव्यामुळे नव्या वादाला तोंड फुटलं आहे. मौलाना इथवरचं थांबले नाहीत. ते म्हणाले, जेव्हा पृथ्वीवर कोणीही नव्हतं तेव्हा मनूने कोणाची पूजा केली? मौलाना यांच्या या विधानाला तिथं उपस्थित असलेल्या इतर अनेक धर्मगुरूंनी विरोध केला. (Maulana arshad madani and controversy on Mohan Bhagwat Meet, Cow National Animal, Om-Allah Ek)

मौलाना अर्शद मदनी काय म्हणाले होते?

ते म्हणाले होते, “मी मोठ्या धर्मगुरुंना विचारलं, जेव्हा श्रीराम, ब्रह्मा, शिवा असं कोणीही नव्हतं, तेव्हा मनूने कोणाची पूजा केली? ते म्हणाले, काही लोकं म्हणतात की ते शिवाची पूजा करायचे, परंतु त्यांनाही नेमकं माहित नाही. काही लोकं सांगतात, जेव्हा जगात कोणीही नव्हते तेव्हा मनू ओमची पूजा केली.

मदनी सांगतात, ‘मग मी विचारलं ‘ओम’ कोण आहे? बरीच लोकं म्हणाले की ही ‘हवा’ आहे. या हवेचं कोणतंही रूप नाही, रंग नाही. ती जगात सर्वत्र आहे, त्यानेच आकाशाची निर्मिती केली, जमीनीची निर्मिती केली. मदनी सांगतात, ‘मी म्हणालो, अरे बाबा, आम्ही त्याला ‘अल्ला’ म्हणतो. तुम्ही त्याला ‘देव’ म्हणा. पर्शियन भाषिक ‘खुदा’ आणि इंग्रजी भाषिक ‘गॉड’ म्हणतात.