पिण्याच्या पाण्यासाठी महिलांची जीवघेणी कसरत, नाशिकमधल्या खरशेत गावातल्या महिलांचे हाल

पिण्याच्या पाण्यासाठी जीवघेणी कसरत करण्याची वेळ नाशिकमधल्या त्र्यंबकेश्वर तालुक्यातील खरशेत गावातल्या महिलांवर आली आहे. सागाच्या एका फळीवरून पाण्यासाठी जीव मुठीत घ्यावा लागतो आहे. अनेक योजना गावात येतात; परंतु वस्तीपर्यंत पोचत नाहीत, ही येथील आदिवासींची व्यथा आहे. वस्तीपासून नदी जवळ आहे; पण पाणी शुद्ध नसल्याने झऱ्यांमधून महिलांना पाणी आणावे लागते. झरे नदीच्या पलीकडे असल्याने पिण्याच्या पाण्यासाठी मोठी कसरत येथील महिलांना करावी लागत आहे.

नाशिकमधल्या त्र्यंबकेश्वर तालुक्यातल्या खरशेत ग्रामपंचायतीच्या परिसरात बारा पाडे आहेत. गावातील पाड्यातील वस्तीवरील अनेक कुटुंब शेतीसाठी पाड्यापासून दीड किलोमीटरवरील तास नदीच्या काठी वास्तव्यास आहेत. हा भाग सखल जमिनीपेक्षा काहीसा उंचावर आहे. सह्याद्रीच्या डोंगरामाथ्यामधून वाहणारी नदी येथे काळ्या खडकांमधून वाहते. काही ठिकाणी हा खडक 25 फूट तर 45 फुटांपेक्षाही सरळ उभा आहे, पण पावसाळ्याचे दिवस सोडले तर येथे पाणी येथे नसते, सखल भागातून येथे पाणी वाहून आणावे लागते, पण सखल भागातून पाणी आणताना महिलांना नदी ओलांडून जावे लागते.