औरंगाबादची आरोग्यव्यवस्था व्हेंटीलेटरवर, ऑक्सिजन बेड्सची कमतरता

राज्यात आज निर्बंध लागू होणार? मुख्यमंत्र्यांनी तातडीने बोलावली कॅबिनेटची बैठक

औरंगाबाद शहरात गेल्या काही दिवसांत वाढत असलेल्या रुग्णसंख्येमुळे परिस्थिती बिघडत चालल्याचं चित्र निर्माण झालंय. औरंगाबाद जिल्ह्यात कोरोनाग्रस्त रुग्णांवर उपचारांसाठी दोन हजार ऑक्सिजन बेड्सची सोय करण्यात आली आहे. परंतू सध्या वाढत असलेल्या रुग्णसंख्येमुळे हे सर्व बेड्स रुग्णांनी भरलेले असल्याचं चित्र आहे. औरंगाबादमध्ये आतापर्यंत १४ हजारांच्या वर कोरोनाचे सक्रीय रुग्ण सापडले आहेत. शनिवारी १ हजार ३९४ नवीन रुग्णांची भर पडल्यामुळे प्रशासनाचे धाबे दणाणले आहेत. ‘मुंबई तक’शी बोलत असताना औरंगाबादचे जिल्हाधिकारी सुनील चव्हाण यांनी जिल्हा प्रशासन परिस्थितीवर नियंत्रण मिळवण्यासाठी सर्वतोपरीने प्रयत्न करत असल्याचं म्हटलं आहे. काही ठिकाणी खासगी हॉस्पिटल्स आणि संस्थांकडूनही मदत मागितली जात असल्याचं जिल्हाधिकाऱ्यांनी स्पष्ट केलं.

“जिल्ह्यातील खासगी हॉस्पिटल आणि संस्थांकडून आम्ही आता मदत मागत आहोत. सध्याची परिस्थिती अशी आहे की आम्हाला जिथून मदत मिळेल तिकडून आम्ही ती घेत आहोत. गरजेच्या वेळी मदतीला येतील अशा १० संस्थांशी आमचं बोलणं सुरु आहे. यापैकी ५ जणांना आवश्यक त्या परवानग्या देण्यात आल्या असून इत५ पाच जणांना लवकरच परवानगी मिळेल.” जिल्हा प्रशासन एकीकडे रुग्णसंख्या आटोक्यात आणण्याचा प्रयत्न करत असताना लोकांनीही प्रशासनाला सहकार्य करण्याचं आवाहन जिल्हाधिकारी सुनील चव्हाण यांनी केलं.

“गरज असेल तरच घराबाहेर पडा यासाठी आम्ही लोकांना वारंवार आवाहन करतो आहे. अनेकदा लोकं तक्रार करत असतात की आता निर्बंध का घातले जात आहेत…पण सध्या ग्राऊंडवर काय परिस्थिती आहे हे लोकांनी समजून घेणं गरजेचं आहे. जिल्हा प्रशासन रुग्णसंख्या आटोक्यात आणण्यासाठी आटोकाट प्रयत्न करत असलं तरीही लोकं नियमांचं पालन करत नाहीयेत. असंच सुरु राहिलं तर परिस्थिती हाताबाहेर जाईल आणि मग त्यावर नियंत्रण मिळवणं कठीण होईल.” जिल्हाधिकाऱ्यांनी वाढत्या रुग्णसंख्येबद्दल चिंता व्यक्त केली.

‘प्लेगच्या साथीत रँडने अत्याचार केले, तसाच अनुभव जनतेला येतोय’

राज्यातल्या सध्याच्या परिस्थितीनुसार, किमान ७०० ते ७५० मेट्रिक टन ऑक्सिजनची गरज आहे. यापैकी एकट्या औरंगाबाद शहरात ५० मेट्रिक टन ऑक्सिजनची गरज आहे. शहरातल ऑक्सिजन बेडची कमतरता भासत असताना ही परिस्थिती चिंताजनक मानली जात आहे. औरंगाबादच्या जिल्हा प्रशासनाने नुकतच राज्याच्या वैद्यकीय संचालकांकडे १५० आयसीयु व्हेंटीलेटर्सची मागणी केली आहे. औरंगाबादच्या जिल्हा वैद्यकीय रुग्णालयातून या १५० आयसीयू व्हेंटीलेटर्सची मागणी करण्यात आली आहे. काही दिवसांपूर्वी मुख्यमंत्री उद्धव ठाकरे यांनी राज्यातल्या एकूण ऑक्सिजन साठ्यापैकी ८० टक्के ऑक्सिजन हा वैद्यकीय उपयोगासाठी तर २० टक्के ऑक्सिजन हा औद्योगिक कामांसाठी वापरला जाईल असे आदेश दिले होते.

नागपूर : कोरोनाग्रस्त महिलेचा मृत्यू, पती आणि नातेवाईकांकडून हॉस्पिटलची तोडफोड

“आतापर्यंत ऑक्सिजन व्हेंटीलेटर, ब्लड थिनर्स यासारख्या थेरपी कोरोनाचा सामना करण्यासाठी उपयुक्त ठरल्या आहेत. आगामी काळात या सुविधा राज्यभरात उपलब्ध होतील याची आपण काळजी घेणं गरजेचं आहे. लोकांचा जीव वाचवण्यासाठी ऑक्सिजनचा साठा राखीव करणं हे सध्याच्या घडीला उचलण्यात आलेलं योग्य पाऊल आहे.”

डॉ. लान्सेट पिंटो – Consultant Pulmonologist, हिंदुजा रुग्णालय