Pooja Chavan suicide case: पूजा चव्हाण-संजय राठोड यांच्यातील ‘ती’ कॉल रेकॉर्डिंग पोलिसांच्या हाती?

गेल्या काही महिन्यांपासून पूजा चव्हाण आत्महत्या प्रकरणाचा तपास सुरु आहे. ज्यामध्ये आता पुणे पोलिसांच्या हाती काही अत्यंत महत्त्वाचे पुरावे लागले आहेत.

सूत्रांकडून मिळालेल्या माहितीनुसार पुणे पोलिसांना पूजा चव्हाण आणि माजी मंत्री संजय राठोड यांच्यात फोनवरुन जे संभाषण झालं होतं त्याच्या अनेक रेकॉर्डिंग सापडल्या आहेत. या रेकॉर्डिंगमध्ये त्यांचा एक कॉल हा तब्बल 90 मिनिटांपर्यंत सुरु होता. जो पूजा चव्हाण हिच्या आत्महत्या करण्याच्या चार ते पाच दिवसांपूर्वीचा होता. अशी माहिती सूत्रांकडून देण्यात आली आहे.

पूजाने 7 फेब्रुवारी 2021 रोजी पुण्यात राहत असलेल्या इमारतीतून उडी मारुन आत्महत्या केली होती. ज्यानंतर दोन दिवसांनी काही फोन कॉल रेकॉर्डिंग हे सोशल मीडियावर व्हायरल झाले आणि त्यानंतर विरोधी पक्षाने याप्रकरणी आवाज उठवत सरकारवर जोरदार टीका केली. अखेर याचप्रकरणी दबाव वाढल्याने संजय राठोड यांना 28 फेब्रुवारी रोजी महाराष्ट्राच्या वनमंत्रीपदाचा राजीनामा द्यावा लागला होता.