Amruta Fadnavis : 1 कोटी लाचेची ऑफर देणारी डिझायनर अनिक्षा कोण?

मुंबई : उपमुख्यमंत्री देवेंद्र फडणवीस यांच्या पत्नी अमृता फडणवीस यांना 1 कोटी रुपये लाचेची ऑफर दिल्याचा प्रकार समोर आला आहे. सट्टेबाजांकडून पैसे उकळण्याचा प्लॅन सांगून एका कथित डिझायनर महिलेने अमृता फडणवीस यांना 1 कोटींची ऑफर दिल्याचा प्रकार घडला आहे. त्यामुळे ही नेमकी तरुणी कोण आहे? ती अमृता फडणवीस यांना कशी भेटली? आणि केवळ पैसे उकळण्याचा प्लॅन होता का? असे सवाल विचारला जात आहे. (1 crore bribe offer to Amruta Fadnavis, Daughter of top bookie posed as designer)

नेमकी कोण आहे ही तरुणी?

अमृता फडणवीस यांना लाचेची ऑफर देणाऱ्या तरुणीचं नाव ‘अनिक्षा जयसिंघानी’ असं आहे. ती वॉन्टेड बुकी अनिल जयसिंघानी यांची मुलगी आहे. सूत्रांनी दिलेल्या माहितीनुसार, अनिक्षा ‘लॉ’ची पदवीधर आहे. तसंच ठाणे जिल्ह्यातील उल्हासनगरची रहिवासी आहे.

दरम्यान, वडिलांना वाचविण्यासाठीच अनिक्षाने अमृता फडणवीस यांच्याशी संपर्क साधला अशी माहिती समोर येत आहे. अनिल जयसिंघानीवर महाराष्ट्र, गोवा, आसाममध्ये विविध ठिकाणी सरकारी अधिकार्‍यांना धमकावणे, फसवणूक करणे आणि दिशाभूल करण्याचे अनेक गुन्हे दाखल आहेत. अमृता फडणवीस यांनी दाखल केलेल्या एफआयआरनुसार त्यांना अनेक वेळा भेट दिली आणि त्यानंतर पळून गेलेल्या आणि पोलिस अधिकार्‍यांपासून लपून बसलेल्या तिच्या वडिलांविरुद्धचे पोलीस खटले बंद करण्यासाठी 1 कोटींची लाच देण्याची ऑफर दिली.