उद्धव ठाकरेंनी मैदान मारलं! शिवसेनेचा दसरा मेळावा शिवाजी पार्कवरच

Shiv Sena Dasara Melava : शिवाजी पार्कवर दसरा मेळावा घेण्याची परवानगी देण्याबाबत शिवसेनेनं मुंबई उच्च न्यायालयात घेतली होती धाव
Shiv Sena dasara dussehra Melava 2022, bombay high court
Shiv Sena dasara dussehra Melava 2022, bombay high court(फोटो सौजन्य: Shivsena @Facebook)

मुंबईतल्या दादर भागात असलेल्या शिवाजी पार्क मैदानावर दसऱ्याच्या दिवशी शिवसेनेचाच आवाज घुमणार, हे स्पष्ट झालं. शिवाजी पार्कवर दसरा मेळावा घेण्यास मुंबई उच्च न्यायालयाने परवानगी दिली. दुसरीकडे एकनाथ शिंदे यांच्या नेतृत्वाखालील शिंदे गटाला मात्र, झटका बसलाय. शिंदे गटाचे आमदार सदा सरवणकर यांची याचिका न्यायालयाने फेटाळून लावली.

मुंबईतल्या शिवाजी पार्कवर दसरा मेळावा घेण्यासंदर्भात उद्धव ठाकरे यांच्या नेतृत्वाखालील शिवसेनेनं मुंबई महापालिकेकडे परवानगी मागितली होती. शिवसेनेनं परवानगी मागितल्यानंतर शिंदे गटाचे सदा सरवणकर यांनीही महापालिकेकडे अर्ज केला होता. त्यानंतर महापालिकेनं दोन्ही अर्ज फेटाळून लावले होते.

मुंबई महापालिकेनं शिवाजी पार्क मैदानावर सभा घेण्यास परवानगी नाकारल्यानंतर शिवसेनेनं मुंबई उच्च न्यायालयात याचिका दाखल केली होती. शिवसेनेनं महापालिकेच्या निर्णयाला आव्हान दिल्यानंतर शिंदे गटाकडून सदा सरवणकर यांनी शिवसेनेच्या याचिकेला विरोध करणारी हस्तक्षेप याचिका दाखल केली होती.

मुंबई उच्च न्यायालयाने आज शिवसेना, शिंदे गट आणि मुबई महापालिका अशा तिन्ही बाजूंचा युक्तिवाद ऐकून घेतला. तिन्ही पक्षकारांची बाजू ऐकून घेतल्यानंतर न्यायालयाने निकाल दिला.

शिवसेना दसरा मेळावा २०२२ : मुंबई उच्च न्यायालयाचा निकाल काय?

मुंबई उच्च न्यायालयाने निकाल देताना सदा सरवणकर यांची विरोध करणारी याचिका फेटाळून लावली. सदा सरवणकर यांना शिवसेनेकडून याचिका करण्याचा अधिकार नसल्याच्या युक्तिवाद मान्य करत मुंबई उच्च न्यायालयाने सदा सरवणकर यांची याचिका फेटाळली.

मुंबई महापालिकेनं शिवाजी पार्कवर दसरा मेळावा घेण्यासंदर्भात करण्यात आलेल्या दोन्ही अर्जांना परवानगी नाकारली. महापालिकेचा निर्णय बरोबर आहे. पोलिसांनी केलेल्या सूचनेनंतर कायदा आणि सुव्यवस्थेचा मुद्दा लक्षात घेऊन बीएमसीने दोन्ही अर्जांना परवानगी नाकारली, असं न्यायालयाने निकाल देताना म्हटलं.

मुंबई उच्च न्यायालयाने मुंबई महापालिकेला फटकारलं!

दोन्ही अर्जांची कल्पना मुंबई महापालिकेला होती. मुंबई महापालिकेकडे शिवसेनेनं अर्ज दाखल केल्यानंतर पोलिसांचा अहवाल महापालिकेला मिळाला. मात्र, शिवसेनेनं कायदा व सुव्यवस्था राखण्याची हमी दिली. मात्र, महापालिकेनं अधिकारांचा गैरवापर केला, अशा शब्दात न्यायालयाने फटकारलं आहे.

शिवाजी पार्क २ ते ६ ऑक्टोबरपर्यंत शिवसेनेकडे

मुंबई उच्च न्यायालयाने शिवसेनेला दसरा मेळावा शिवाजी पार्कवर घेण्यास परवानगी दिली. २ ते ६ ऑक्टोबरपर्यंत शिवसेना शिवाजी पार्क मैदानाचा वापर करू शकते, असं न्यायालयाने आदेशात स्पष्ट केलं आहे.

Related Stories

No stories found.
Mumbai Tak
www.mumbaitak.in