मुख्यमंत्र्यांसह सर्व मंत्र्यांच्या ताफ्यातील वाहनांची संख्या अर्ध्यावर; मोदींच्या आवाहानानंतर 4 मोठे निर्णय

Chief Minister Devendra Fadnavis : पंतप्रधान नरेंद्र मोदी यांनी इंधन आणि परकीय चलनाची बचत करण्याच्या अनुषंगाने केलेल्या आवाहनाला प्रतिसाद देत मुख्यमंत्री देवेंद्र फडणवीस यांनी आज (दि.13) मुंबईत एका उच्चस्तरीय बैठकीत महत्त्वपूर्ण निर्णयांची घोषणा केली. या बैठकीला मुख्य सचिव, पोलीस महासंचालक आणि इतर वरिष्ठ अधिकारी उपस्थित होते. मुख्यमंत्र्यांनी घेतलेल्या निर्णयानुसार, आता मुख्यमंत्री आणि सर्व मंत्र्यांच्या ताफ्यातील वाहनांची संख्या तात्काळ प्रभावाने अर्ध्यावर आणण्याचे आदेश देण्यात आले आहेत. या नियमाचे पालन करण्याची जबाबदारी संबंधित पोलीस आयुक्त किंवा पोलीस अधीक्षक यांच्यावर सोपवण्यात आली असून, बाहेरच्या प्रवासात ताफ्यातील वाहने निर्धारित संख्येपेक्षा जास्त नसावीत, असे स्पष्ट करण्यात आले आहे.