Inside Story: ठाकरेंचे खास ओमराजे निंबाळकर कसे आणि का गेले?, चारच गोष्टी!
उद्धव ठाकरे यांच्या अतिशय विश्वासातले समजले जाणारे खासदार ओमराजे निंबाळकर हे त्यांची साथ सोडून शिवसेना (शिंदे गट) पक्षात प्रवेश करत असल्याचं आता जवळजवळ निश्चित झालं आहे. जाणून घ्या याच सगळ्या घटनेची इनसाइड स्टोरी.
ADVERTISEMENT
मुंबई: ठाकरेच्या शिवसेनेचे काही खासदार शिवसेनेत गेले आहेत. अर्थात यावर अजून अधिकृतपणे शिक्कामोर्तब झालं नसलं तरी शिवसेनेचं म्हणजे एकनाथ शिंदेंचं 'ऑपरेशन टायगर' यशस्वी ठरलंय. यातलं सर्वाधिक शॉकिंग नाव आहे ते ओमराजे निंबाळकरांचं. सर्वात जास्त भावनिक लाटेवर निवडणूक झाली ती धाराशिव लोकसभा मतदारसंघातली. ओमराजेंना लोकांनी फक्त भाषणं ऐकूण आणि इमोशनली भरभरून मतं दिली अगदी विक्रमी. सगळी ताकद विरोधात एकवटली असतानाही ओमराजेंना चार लाखांहून अधिक मतांनी जिंकून दिलं. आता काही गोष्टी विरोधात असताना मिळत नसतातच आणि हे राजकारणात चालतं. मात्र ओमराजेंचा प्रेझेन्स ही गोष्ट कमालीची होती, आहे. त्यांनी कामं केली नसती तरीही त्यांचा रीच, कनेक्ट आणि इमोशन या बळावर ते 2029 ला सहज निवडून आलेच असते, असंही बोललं जातंय.
मात्र, ओमराजेंचं पक्ष सोडून जाणं हा कार्यकर्त्यांसाठी मोठा धक्का आहे शिवाय ठाकरेंसाठीही. आता ओमराजे कसे गेले आणि का गेले हे तर आपल्याला जाणून घ्यायचं आहेच. मात्र ओमराजेंभोवतीची थोडी चर्चा व्यवस्थित समजून घेऊयात.
ओमराजेंनी ठाकरेंची साथ सोडण्याची Inside Story
खासदार ओमराजे निंबाळकर दिल्लीत दाखल झाले असल्याची माहिती आहे. अर्थात ते कुठे आहेत याचे अनेक अंदाज बांधले जात आहेत. सूत्रांच्या मते, मंगळवारी रात्री 1 वाजता एका खाजगी विमानाने त्यांनी पुण्यातून दिल्लीसाठी उड्डाण केलं. ओमराजे निंबाळकरांना दिल्लीला नेण्यासाठी पुणे विमानतळावर विशेष व्यवस्था करण्यात आली होती. खासदार श्रीकांत शिंदे यांच्या नावाने 2 खाजगी विमानं पुणे विमानतळावर सज्ज ठेवण्यात आली होती. ओमराजे निंबाळकर यांच्या दिल्ली दौऱ्याचा प्लॅन अत्यंत गोपनीय ठेवण्यात आला होता आणि दिवसभरात या विमानांच्या उड्डाणाच्या वेळेत तब्बल तीन ते चार वेळा बदल करण्यात आला असल्याची देखील माहिती आहे.
हे ही वाचा>> 'वडिलांच्या हत्या प्रकरणाचा निकाल तुमच्या बाजूने हवा असेल तर...', ओमराजे निंबाळकरांबाबत राऊतांनी उडवून दिली खळबळ
या विशेष विमानाने केवळ ओमराजे निंबाळकरच गेले नाहीत, तर त्यांच्यासोबत माजी मंत्री तानाजी सावंत तसेच जय राजे निंबाळकर हे देखील दिल्लीला गेल्याची माहिती आहे. याशिवाय एक मंत्री देखील सोबत असल्याची माहिती आहे. आता मुंबई Tak नं ज्यावेळी ओमराजेंशी संपर्क करण्याचा प्रयत्न केला तेव्हा ते पुण्यातच आहेत असं एकदा कळलं, नंतर दिल्लीहून पुण्याला आले असंही कळलं.
सुषमा अंधारेंनी याबाबत महत्त्वाची माहिती दिलीय. 'ओमराजेंना मी सकाळी फोन केला, पण माझा फोन त्यांनी उचलला नाही. ओमराजे तानाजी सावंतांसोबत दिल्लीला गेले. मग मी त्यांच्या पाठीशी भावासारखे, सावलीप्रमाणे सोबत असणाऱ्या आमदार कैलासदादा पाटील यांना फोन केला. ते म्हणाले, ताई मी दुसऱ्यांची गॅरंटी कशी देऊ, मी माझी गॅरंटी देऊ शकतो. त्यामुळे कैलास पाटलांच्या बोलण्यातील संधिग्धता बरीचशी बोलकी आहे.' असंही सुषमा अंधारेंनी म्हटलं. असो.. ते दिल्लीला गेले की नाही हे एवढं महत्त्वाचं नाही, मात्र ते ठाकरेंची साथ सोडत आहेत हा महत्त्वाचा मुद्दा आहे. नेटवर्क 18 मराठीशी बोलताना ओमराजेंनी आपण 20 तारखेनंतर भूमिका स्पष्ट करु असं म्हटलं. मात्र, ठाकरेंसोबतच राहणार असं ठामपणे सांगितलेलं नाही. आता याचे अर्थ आपण समजून जायचे.
