उपोषणाला बसतो अन् बाथरुममध्ये खातो; कदमांच्या जहरी टीकेनंतर जरांगे भडकले; म्हणाले, “थोरली बेगम”

मराठा समाज तुम्हाला उद्ध्वस्त केल्याशिवाय राहणार नाही : रामदास कदम 

रामदास कदम यांनी दसरा मेळाव्यातील भाषणात मनोज जरांगे पाटील यांच्यावर निशाणा साधला. जरांगे यांनी एकनाथ शिंदे यांच्याबाबत केलेल्या विधानाचा उल्लेख करत कदम म्हणाले की, शिंदे यांना उद्ध्वस्त करण्याचा प्रयत्न केल्यास मराठा समाज तुम्हाला उद्ध्वस्त केल्याशिवाय राहणार नाही. जरांगे यांच्यावर टीका करताना त्यांनी उपोषण आणि बाथरुममध्ये जाऊन गुपचूप खाण्याचा आरोप केला. एकनाथ शिंदे यांनी मराठा समाजाला आरक्षण देण्यासाठी प्रयत्न केले, असंही कदम यांनी सांगितलं. शिंदे यांना बेईमान म्हणण्यावरून त्यांनी जरांगे यांना सवाल केला. 500 कोटी रुपये दिल्याचा आरोप करताना पैसे कोणी दिले, कुठे दिले आणि कसे दिले, याचा खुलासा करण्याचं आव्हानही कदम यांनी दिलं. या विधानांमुळे दोन्ही बाजूंमधील वादाला आणखी धार आली.

‘थोरली बेगम’ म्हणत मनोज जरांगेंची कदमांवर टीका 

रामदास कदम यांच्या टीकेला उत्तर देताना मनोज जरांगे पाटील यांनी त्यांचा उल्लेख ‘थोरली बेगम’ असा केला. मात्र, वयाने मोठे असल्यामुळे कदम यांच्याबद्दल अधिक बोलायचं नसल्याचंही त्यांनी सांगितलं. मराठा समाजाच्या लेकरांची प्रमाणपत्रं रद्द केल्याचा आरोप करत जरांगे यांनी शिंदे यांच्यावर प्रश्न उपस्थित केले. आपण तीन महिने टीका करणार नसल्याचं सांगितलं होतं; मात्र आपल्या प्रश्नांची उत्तरं मिळाली पाहिजेत, असं ते म्हणाले. केवळ आपल्यावर आरोप करण्याऐवजी आपण उपस्थित केलेल्या प्रश्नांना उत्तर द्यावं, असंही त्यांनी सांगितलं.

या वादाची सुरुवात नारायणगडावरील दसरा मेळाव्यातून झाली. बीडमधील नारायणगड येथे झालेल्या मेळाव्यात मनोज जरांगे पाटील यांनी एकनाथ शिंदे यांनी भाजपकडून 500 कोटी रुपये घेऊन आपल्याला दिल्याची चर्चा सुरू असल्याचा दावा केला होता. हा आरोप खरा आहे की खोटा, याचा शिंदे यांनी त्याच दिवशी खुलासा करावा, असं आव्हान जरांगे यांनी दिलं होतं. त्यानंतर रामदास कदम यांनी जरांगे यांच्यावर टीका करत त्यांच्या संपत्तीची चौकशी करण्याची मागणी केल्याचा उल्लेखही जरांगे यांनी केला. या आरोपांवरून सुरू असलेल्या वादात जरांगे यांनी पुन्हा एकदा 500 कोटी रुपयांच्या दाव्याबाबत थेट उत्तर मागितलं. शिंदे यांच्या शिवसेनेने ही रक्कम दिली की नाही, एवढंच स्पष्ट करावं, अशी त्यांची मागणी आहे.