Exclusive: ...तर थेट जन्मठेप! तुकाराम मुंढेंचा मोठा इशारा, दूधात भेसळ करायचा विचार विसरून जा!
'कायदा एवढा सक्षम आहे की, यामध्ये जर अनसेफ फूड आलं तर त्याला थेट जन्मठेपेची शिक्षा आहे. होय.. जन्मठेपेची शिक्षा आहे.' असा थेट इशारा आयुक्त तुकाराम मुंढे यांनी भेसळखोरांना दिला आहे. मुंढेंनी मुंबई Tak ला दिलेल्या विशेष मुलाखतीत यासंबंधी अनेक गोष्टींवर भाष्य केलं आहे.
ADVERTISEMENT
मुंबई: राज्यात दूध आणि दुग्धजन्य पदार्थांमधील भेसळीविरोधात अन्न आणि औषध प्रशासन (FDA) विभागाने मोठी मोहीम सुरू केली असून, लोकांच्या आरोग्याशी खेळणाऱ्यांविरोधात कठोर कारवाईचा इशारा देण्यात आला आहे. घातक आणि भेसळयुक्त अन्नपदार्थ विकल्यास संबंधितांवर थेट जन्मठेपेपर्यंतची कारवाई होऊ शकते, अशी स्पष्ट चेतावणी अन्न व औषध प्रशासन विभागाचे आयुक्त तुकाराम मुंढे यांनी मुंबई Tak ला दिलेल्या विशेष मुलाखतीत दिली.
मुंढे म्हणाले की, 'राज्यभर तपासण्या मोठ्या प्रमाणात वाढवण्याचे निर्देश देण्यात आले आहेत. विशेषतः दूध आणि दुग्धजन्य पदार्थांवर यावेळी अधिक लक्ष केंद्रित करण्यात आले आहे. त्यासाठी सर्व डेअरी चालक, दूध संकलन केंद्रांचे प्रतिनिधी आणि दुग्ध उद्योगातील संबंधितांना एकत्र बोलावून बैठक घेण्यात आली.'
त्यांच्या म्हणण्यानुसार, 'FDA च्या इतिहासात प्रथमच अशा प्रकारची व्यापक बैठक आयोजित करण्यात आली. या बैठकीत उद्योगातील संबंधितांना सर्व नियम समजावून सांगण्यात आले आणि नियमांचे उल्लंघन केल्यास काय परिणाम होऊ शकतात, याचीही सविस्तर माहिती देण्यात आली.'
'महाराष्ट्रातील 32 टक्के दूध नमुने असुरक्षित'
तुकाराम मुंढे यांनी सांगितले की, 'बैठकीदरम्यान आरोग्य विभागाच्या सर्वेक्षणातील आकडेवारीही संबंधितांना दाखवण्यात आली. या सर्वेक्षणानुसार, महाराष्ट्रातील तपासण्यात आलेल्या दूध नमुन्यांपैकी जवळपास 32 टक्के नमुने 'अनसेफ' (Unsafe) आढळले आहेत. ही आकडेवारी अत्यंत चिंताजनक असून, यामुळे दूध भेसळीचा प्रश्न किती गंभीर आहे, हे स्पष्ट होते.'
